DAKBAYAN SA DABAW (Septembre 28) — Pormal nang abrihan sa publiko sa sunod bulan ang Davao Food Terminal Complex kon ‘Bagsakan’ didto sa Daliao, Distrito sa Toril ning dakbayan.
Ang bag-o palang nahuman ng food terminal complex, himoong bagsakan sa tanang produktong pag-agrikultura gikan sa nagkada-iyang bahin sa rehiyon onse (XI).
Didto mapalit ang tanang klaseng gulay ug prutas sa baratong presyo.
Matud pa mi Samuel Escamis, ang municipal agriculturist ning Dakbayan, sugdan na paggamit ang bagsakan,  human sa duha ka tuig nga pagpanday niini.
Naggahin na ang lokal nga panggamhanan ug ang Department of Agriculture og P70-milyones ka pesos alang sa operasyon sa bagsakan.
“Wholesale” kon binulto ang pagbaligya sa mga produkto didto, saysay ni Escamis.
Ang mga organisadong grupo sa mag-uuma didto usab maghatud sa ilang produkto.
Sa pagkakaron, aduna nay hawler track nga mao unyay gamiton sa paghakot sa mga produkto paingon sa bagsakan.
Gihimoan ug mga kuarto nga tulganan ang mga mag-uuma nga maabtan sa kagabhi-on didto sa bagsakan, ug aduna kini mga banyo.
Ang bagsakan adunay dakung ‘chiller’ nga pondohanan sa mga produkto aron magpabilin kining presko.
Si Mayor Sara Duterte-Carpio nanghinaut nga ang bagsakan, mamahimong instrumento nga modasig sa mga mag-uuma, aron mapatas-an pa ang ilang abot.
Gani, matud sa Mayor, kung mosobra na ang mga produkto alang sa kinahanglanon sa mga Dabawenyo, mamahimo kining ipadala sa ubang lugar kung asa nihit ang produkto sa ilang merkado.
Gi-awhag ni Escamis ang mga mag-uuma nga ipa-rehistro na sa ilang grupo aron mahatagan sila ug ayuda gikan sa lokal nga panggamhanan ug sa ilang buhatan, ug aron usab matabangan sila sa pagpalambo sa ilang uma, ug adunay diritsong mopalit sa ilang mga produkto.-Harold V. Pontongan/NewsLine.ph
