DAKBAYAN SA DAVAO (Abril 15)–Ang pagsugod sa Semana Santa mahimong init ug umog nga adunay “delikado” nga forecast sa kainit sa 19 ka mga lungsod ug munisipyo, sumala sa Philippine Atmospheric, Geophysical and Astronomical Services Administration (Pagasa).
Sa forecast sa Pagasa walay lugar sa Mindanao nga maapektuhan.
Ang makapaso nga panahon tungod sa mga epekto sa easterlies, o ang init nga hangin nga gikan sa Dagat Pasipiko, nga karon nakaapekto sa Metro Manila ug kadaghanan nga bahin sa nasud, sumala sa espesyalista sa panahon nga si Veronica Torres.
Sa laing bahin, ang mga dapit sa extreme northern Luzon, sama sa Batanes ug Babuyan Islands, makasinati ug madag-umon nga kalangitan ug pag-ulan tungod sa frontal system, matod niini sa alas-5 sa hapon.
“Ang panahon mahimong init ug ang umog gikan sa buntag hangtod sa udto, apan gikan sa hapon hangtod sa gabii motaas ang posibilidad sa localized thunderstorms,” dugang ni Torres.
Ang mosunod nga mga lugar gipaabot nga adunay heat index nga 43 degrees Celsius karong Lunes, nga apil sa “peligro” nga klasipikasyon sa Pagasa nga gikan sa 42ºC ngadto sa 51ºC: Dagupan City, Pangasinan; San Ildefonso, Bulacan; Sangley Point, Cavite City, Cavite; San Jose, Occidental Mindoro; Puerto Princesa City ug Cuyo, Palawan; Virac, Catanduanes; Masbate City, Masbate; Roxas City, Capiz; ug Iloilo City, Iloilo.
Samtang, ang mga lugar sa Bacnotan, La Union; Tuguegarao City, Cagayan; Echague, Isabela; Cubi Point, Subic Bay, Olongapo City; Ambulong, Tanauan, Batangas; Coron, Palawan; Daet, Camarines Norte; Dumangas, Iloilo; ug Catarman, Northern Samar makasinati ug heat index nga 42ºC.
