DAKBAYAN SA DAVAO-–Dili kinahanglan magdeklara og giera kontra druga, mao kini ang baruganan sa bag-ong milingkod nga hepe sa Philippine National Police (PNP).
Sa iyang unang pag atubang sa miembro sa media niadtong Martes, gisaysay ni PNP Chief Gen. Rommel Francisco Marbil ang iyang mga polisiya sa pagpasiugda sa organisasyon.
Matud ni Marbil hangtud mahuman ang iyang termino, dili kinahanglan ang “war on drugs” aron mamahimong gawasnon sa illegal nga druga ang mga komunidad.
Gisaysay sa opisyal, dili siya momando nga maglumba og padaghanay og mga nakunpiskang druga ang kapulisan gikan sa mga operasyon.
“Ang gusto namin is ano talaga, hindi yung paramihan kasi napipilitan ka eh. Sige magparamihan tayo ng huli, pero you don’t solve the problem.. Now it’s more of key performance indicator based doon sa kanya-kanyang regions. Ano ba specific na problema ng regions mo then we will base yung sa performance mo,” dugang ni Marbil.
Gipasabot ni Marbil “Wala po kaming giyera dito. Hindi ito giyera na kailangan. It’s more of talaga na papaano natin mapapababa yung crimes natin based doon sa mga parameters natin. I don’t want to say na may drug war, parang giyera na naman kami.”
Giwarning usab ni Marbil ang mga pulis nga dili mogamit og mobile phone samtang nagaduty sila.
Kung masapnan nga ang pulis naggunit og mobile phone samtang nakaduty, dili niya kini pasayloon kay iyang pahugtan ang polisiya kabahin sa paggamit og mobile phone.
Ang gustong mahitabo ni Marbil nga ang mga pulis magsige og patrol aron mabati sa mga tawo ang presenya sa kapulisan.
Dili usab kuno siya magkambyo og mga opisyal sama sa kanunay ginahimo sa mga bag-ong lingcod nga mga hepe sa PNP.
