DAVAO CITY —- Nadala pa sa Holy Spirit Hospital ang usa sa mga suspek nga napusilan sa mga miresponding pulis apan gibalibaran kini hinungdang gidala sa mga pulis sa Southern Philippines Medical Center pero gideklara sa doktor nga dead upon arrival.
Subay sa report sa kapulisan, bandang alas 8:30 kagabii, Hulyo 19, 2023 dihang nagpahibalo si PSSg Mohaimen Pendatun Abdillah nga nadestino sa foot and bike patrol nga adunay biktima sa pagpanulis nga giila sa pangalang Bernardo Tocmo Caminade, 50 anyos, taga Purok 4, Barangay Fatima, Paquibato District, Davao City.
Nahitabo ang pagpanulis sa Davao-Bukidnon Highway, Dacudao, Barangay Mintal, Tugbok District ning syudad.
Saysay sa biktima nga kalit gihiktan og nylon ang iyang liog sa iyang pasahero samtang ang kauban niini ang pugsanong miilog sa manubela sa gimaneho niyang ongbak apan milugnot si Caminade ug nakaipsot gikan sa duha ka tulisan mao nga nakapangayo siya og tabang.
Dinhi na gialerto ang mga pulis kay gidala sa duha ka tulisan ang ongbak ug naglusad og pursuit operation ug naabtan sa mga pulis ang duha ka mga suspek nga nailhan ang gisakyan nga ongbak base sa paghulagway sa biktima diha sa highway sa Purok 13, Quarry, Barangay Tugbok Proper, Tugbok District, Davao City una moabot sa Angalan Bridge 1.
Dihang i-verify na sa pulis ang nagdala sa ongbak gipusil hinuon sa suspek ang pulis hinungdang mibalos kini ug naigo ang usa sa mga suspetsado apan nakasibat ang kauban sa napusilan nga tulisan subay sa kasagbutang bahin sa lugar ug wala na igkita.
Sa hospital na nailhan ang usa sa mga tulisan pinaagi sa narekober nga mga ebidensiya sama sa driver’s license nga nailhan sa pangalan nga Hilal Aloyodan Mustapha, residente sa Marogong, Lanao Del Sur.
Apil sa narekober sa mga pulis ang usa ka revolver nga gigamit sa suspek, basyo sa bala sa .9mm pistol.
Ginapangita pa sa mga pulis ang nakasibat nga suspek.
