DAKBAYAN SA DABAW — Laing “sweeper flight” nga gikomisyon sa Davao City Government ang niabot sa Miyerkules, Mayo 6, sakay ang dugang 270 ka mga Dabawenyo nga na-stranded og kapin usa ka bulan didto sa Luzon.
Kini ang gipahibalo ni Mayor Sara Duterte sa iyang pakighinabi sa Davao City Disaster Radio.
Ingon ni Mayor Duterte-Carpio nga kasagaran sa mga nakasakay sa sweeper flight mga overseas Filiino worker (OFW) nga padulong na untang mouli sa Davao apan natanggong didto sa kaulohan sa dihang gipaubos ang tibuok Luzon sa Enhanced Community Qurantine.
Hinuon, natingala ang mayor nganong gamay ra ang mga nakasakay sa sweeper flight kaysa iyang gilauman nga gidaghanon sa mga Dabawenyo nga makapauli nianang adlawa.
“Dapat mas daghan pa ang naka sakay ato, but I don’t know what happened, 270 lang ang nisakay sa eroplano,” sulti ni Duterte-Carpio.
Ang maong sweeper flight ang ikaduhang gikomisyon sa lokal nga kagamhanan alang sa pagdala pauli sa mga Dabawenyo nga natanggong sa Luzon.
Ang ikaduhang sweeper flight mibalik dayon sa Manila sakay ang 400 ka mga pasahero nga natanggong diri si Davao.
Niadtong Lunes, Mayo 4, 150 ka mga taga Mindanao — 120 niini mga Dabawenyo — miabot sa Davao gikan sa Clark.
Ang tanang mga nakauli nga Dabawenyo ug ubang mga taga Mindanao gipaubos sa “rapid testing” ug sa 14 ka adlaw nga kwarentina. (LBG)
