DAKBAYAN SA DAVAO — Andam mosuporta silang Senador Risa Honteveros ug Koko Pimentel sa mga grupo nga nagplanong ikuestyon ang Maharlika Investment Fund (MIF) nga gipasar na sa Kongreso ug sa Senado.
Si Pimentel isip lider sa minorya sa Senado una nang nagpadayag sa iyang pagsupak sa pipila ka probisyon sa Maharlika Fund, apan, wala kini nakadulot sa dihang mayoriya sa Senado misuporta sa gustong mahitabo ni Presidente Ferdinand Marcos Jr.
“Andam kong mosuporta sa mga argumento, inpormasyon ug mga legal nga gikinahanglan kung dunay grupo nga mopasaka ug kaso sa korte aron i-kuestyon ang Maharlika Fund,” saysay sa Seandor atol sa iyang pakigpulong sa media.
Gibarugan ni Pimental nga dili pa panginahanglanon ang Maharlika Fund sa pagkakaron, ug dunay laing prioridad nga angayang himoun ang gobierno aron matabangan ang katawhan nga matabokan ang kagutom ug kawad-on.
Gipunting sa senador ang “Section 16, Article XII” sa 1987 Constitution, nga nagbunyag nga ang mga GOCCs [Government-owned or controlled corporations] gikinahanglan nga mopasar sa pagrepaso sa ekonomikanyong benepisyo sa matag lakang niini ug kini gikinahanglan mga istudyuhan sa mga eksperto ug duna kini basehan sa ilang mga argumento.
Sumala ni Honteviros, dili ang Maharlika ang gikinahanglan sa mga Pilipino ug andam siyang mosuporta sa mga mobatok niini sa Korte Suprema,
Ang pagrepaso sa MWF sa mga eksperto mas makatabang sa publiko nga masambtan ang katuyuan niini ug mawala ang mga pagduda, sumala ni Pimentel.
Kahinumduman nga daling gipasar sa Kongreso ug sa Senado ang balaud nga matukod ang Maharlika Fund.
Una nang gipasabot sa Presidente nga ang pondo sa Maharlika gamiton aron pakusgan ang sektor sa agrikultura, enerhiya ug sa internet (digitalization) ug sa pagbatok sa Climate Change (pagbag-o-bag-o sa lakat sa panahon).
Niadtong Mierkules, mipasibaw si Senador Chiz Escudero nga ang pagpasar sa MIF nag abri sa dakung posiblidad nga tuki-on og ikuestyon ang Batakang Balaud o ang Konstitusyon.
Atol sa deliberasyon, desis-sais (16) ka senador ang mibabag sa suhistyon ni Pimentel nga ipasa ang balaud sa Committee on Government Corporations and Public Enterprises aron makita ang mga buslot ug matarong kini, apan, wala siya midaug.
Wala misuporta si Senador Nancy Binay sa pagpasar sa MIF tungod kay matud niini, mas daghan siya og pangutana kabahin sa balaud kaysa iyang nasabtan.
Nakatakda sa MIF nga magbutang og inisyal nga P50-bilyon nga pondo sa MIF ug didto kini juhaon sa Land bank of the Philippines, laing P15-bilyon ang kuhaon sa Development Bank of the Philippines ug P50-bilyon sa kaban sa Pilipinas.
Kung pirmahan na sa Presidente ang bag-ohay palang napasar nga balaud, dunay kini P125-bilyon nga pondo.
