DAKBAYAN SA DABAW, Mindanao — Gi-aghat ni Presidente Rodrigo R. Duterte ang nagkadaiyang tribu sa mga lumad kagahapon nga dili na mosuporta sa mga rebelde ug mananum nalang ug lubi, goma, saging, palm oil aron ilang panginabuhian.
Si Duterte nga namulong atol sa ika-16 nga kasumaran sa Supreme Tribal Council for Peace and Development, didto sa Calinan District, nag-awhag sa mga lumad nga mo-undang na sa pagsuporta sa kalihukan sa mga subersibong grupo sa New Peoples Army (NPA) ug himoung malambuon ang ilang ekonomiya pinaagi sa pagpananaum.
Atol sa maong tigum, dul- an usa ka milyon ka mga punuan sa lubi ang gipang apud apud itanom sa mga ancestral domain sa Paquibato District, kini ang unod sa memorandum of agreement nga gipirmahan tali sa supreme Tribal Council for Peace and Development ug sa Philippine Coconut Authority.
Gihimo ang kasabutan atol sa pagsaulog sa 16th founding Anniversary sa Supreme Tribal Council for Peace and Development gahapon, March 24, 2018 sa 3rd IB sa brgy. Malagos, Baguio District
Tumong sa maong programa nga makaabot sa mga Indigenous People ang mga programa sa Gobyerno hilabi na ang gisaad ni President Rodrigo Duterte
Gi-aghat sab ni Duterte ang tribu nga mananom sab ug mga punuan sa cacao ug kape arun dugang kita alang sa tribu.
Aron dili maglisod ang mga lumad ug buhi sa ilang pamilya samtang nagtikad sila sa ilang pananum, misaad si Duterte nga mohatag ang goberno ug sueldo balor P2,500 kada buwan samtang ilang gi-ugmad ang ilang pananum.
Ang maong okasyon gitambungan sa 33 ka mga tribal leaders sa tibuok Mindanao ug ni President Rodrigo Duterte
Ang mga mipirma sa kasabutan kon MOA gilangkuban nila Datu Roel Ali chairman supreme tribal council for peace and development, Sec. Eduardo Del Rosario nga nabunyagan sa tribu isip Datu Limbatong Chairman of Housing Urband and Development Coordinating Council (HUDCC) og Philippine Coconut Authority (PCA) administrator Romulo Del Rosario.
“Undang na mo ug suporta sa mga NPA, ingna sila, dili na mi ninyo, among buhion ang among pamilya.” Matud pa ni Duterte.-Rey Nuñez/Newsline.ph
