SI PANGULONG Rodrigo Duterte mohatag og P20 milyones nga ganti ngadto sa makahimo og mga respirator alang sa mga pasyente nga adunay coronavirus disease (Covid-19).
Matud pa ni presidential spokesperson Harry Roque kagahapon, Abril 28, si Pangulong Duterte nitanyag sa maong ganti tungod sa kakulang sa mga respirator sa mga tambalanan.
“Nagbigay po ng pabuya ang ating Presidente –- PHP20 million — para sa sinumang Pilipino na makakabuo ng local respirators na sabi niya ay dapat naman could outlast the life of a patient,” ingon ni Roque.
Niadtong Lunes, Abril 27, gimanduan usab sa Pangulo ang Department of Science and Technology (DOST) ug ang Food and Drug Administration (FDA) nga paspasan ang pag-implementar sa mga proyekto nga gitumong sa pagsumpo sa Covid-19.
Giluwatan ni Duterte ang kamanduan human giangkon ni DOST Secretary Fortunato dela Peña nga ang nasud naglisud sa pagpalit og mga imported ventilator tungod sa kataas sa demanda niini karong mga panahona.
Gitutokan karon sa DOST ang ilang “Project Ginhawa” — ang pag-mass produce og mga ventilator nga gaan ug mas barato kumpara sa mga imported nga ventilator.
Sa laing bahin, gi-aprubahan na sa Department of Budget and Management ang gipangayo sa Department of Health (DOH) nga P45.717 bilyones nga budget alang sa ilang mga programa kalabot sa pagsumpo sa pandemya.
Ang P1.35 bilyones sa maong budget sa DOH gamiton sa pagpalit og 1,500 ka mga mechanical ventilator nga gikinahanglan sa mga publikong hospital ug mga piniling pribadong tambalanan.
Niadtong Abril 23, gipatas-an usab ni Pangulong Duterte ngadto sa P50 milyones ang ganti alang sa bisan kinsang Pilipino nga makabuhat og tambal sa Covid-19. (LBG)
