DAKBAYAN SA DABAW — Daku na og epekto ang conoravirus-19 pandemic sa mga gagmayng negosyo dinhi sa dakbayan kay gibati na sa mga ginikanan ang epekto niini diha sa pagpa-eskwela sa ilang mga anak.
Usa na niini si Arlene Cortiz, tag-iya og kan-anan nga naga silbi og sinugba, deep fry, ug uban pang klase sa pagluto sa pantat kon hito sa barangay Tugbok ning dakbayan.
Matud ni Arlene, sauna ang pinakagamay nilang kitaon sa usa ka adlaw kaniadto mokabat sa P10,000, apan sukad miigo ang Covid-19 pandemic, malipay na sila kung makahalin og P2,000 kada adlaw.
Gawas niana, ang hagit sa pagpa-eskwela sa iyang mga anak, nagpabiling nga sakit sa iyang ulo, tungod kay wala silay kapasidad nga mamalit og gamit alang sa online-learning sa iyang usa ka elementary, duha ka high school ug usa ka nga anaa sa koliheyo.
Mas sakit kaniya nga mapugos sila nga modular ang pamaagi sa pagtoun sa iyang mga bata, tungod kay isip usa ka high school graduate, nakalimot na kini sa mga leksyon niya sa dihang nagtuon pa siya.
Ang istorya ni Arlene usa lamag sa mga istorya sa milyones nga inahan sa tibouk kapupud-an nga nag-atubang sa dakung hagit sa ilang panginabuhian ug sa pagpadala sa ilang anak sa tulunghaan.
Ang hagit sa ekonomiya ug sa pamaagi sa edukasyon, maoy gipas-an sa katawhan karon tungod sa pandemya.
Apan matud ni Arlene, daku ang iyang pagsalig sa Ginoo nga ilang malabangan ang mga pagsulay. Newsline.ph
