DAKBAYAN SA DABAW— Gipahibalo sa Department of Education (DepEd) niadtong Miyerkules, Marso 23 nga ilang gipa-usab ang School Safety Assessment Tool (SSAT) aron mas dali nga ipatuman sa mga eskwelahan ang mga requirements sa hinay-hinay nga pagsugod sa limited-face-to-face classes.
Usa ka checklist ang SSAT kung diin kinahanglan sundon sa mga magtutudlo aron andam ang mga eskwelahan sa pagpahigayon og limited face-to-face classes bisan naa pa ang hulga sa pandemya.
Matud ni Education Assistant Secretary Malcolm Garma, mas gipili sa DepEd ang pagpabag-o sa SSAT tungod daghang iskwelahan ang mireklamo tungod lisod sundon ang SSAT.
Naglaum si Garma nga pinaagi sa bag-ong SSAT daghan pang mga eskwelahan ang mangabli-balik alang sa F2F classes ug ang bag-ong assessment tool na unya ang tumanon.Sa pagakakaron, adunay 10,196 ka mga eskwelahan sa nasud ang nagsugod sa pagpahigayon og limited face to face classes.
Apan magpabilin gihapon ang remote learning sa ubang mga eskwelahan nga nangandam pa sa pagsugod og pagbalik sa Face-to-face classes.
