TAGUM CITY — Gisugdan na og pamalit sa probinsyal nga panggamhanan ang mga gulay, lagotmon gikan sa mga mag-uuma sa Davao del Norte isip tabang kanila aron mokita panahon sa pandemya.
Kini ang tubag ni Governador Edwin I. Jubahib sa mulo sa katawhan nga hapit na malumos sa utang tungod sa pagbagsak sa presyo sa gulay sa mga merkado.
Una niini, mipadangat og sulat si Tarcila Egida, chairperson sa Semong Agro-Forestry Farmers Association (SAFAS) ug nangayo kini og tabang sa gobernador, gisaysay niini nga naglisod na gayud ang mga maguuma og gulay tungod kay haslos wala na silay maharvest kay nangadaut ang ilang pananum og kun aduna may mabilin, barato kaayo ang palit sa ga negosyante, ‘Class A’ lang ang ilang pamaliton samtang ang class B ikonsiderang reject og sagad ipanglabay na lang, kay wala na silay panahon nga maghulat hangtud mahurot og kahalin ang ilang gulay labi na kay limitado ang lihok sa mga merkado kay dunay hulga sa Coronavirus.
Ang SAFAS, kapunongan sa mag-uuma’g gulay, matud ni Egida, dugay na silang nag-antos sa kalisod gikan sa problema sa pag-pangataki sa ilaga ug sa pagdagsang sa dangan sa ilang pananom, wala usab kuno nakabuelo og tubo ang ilang tanum tungod kay usahay sobra ang kainit ug sobra usab ang ulan.
“Pait na kaayo, maong nangayo mi og tabang kang Kuya Gob, og pasalamat mi kay tibubag dayon niya ang akong sulat og nagpadala siay og staff aron mahapsay ang himoung tabang sa probinsya,” saysay ni Egida.
Tuod man, niadtong Lunes, Oktubre 12, mitungas ang KAAGAPAY kon (KAwsa sa AGrikulturA ug PAnginabuhian sa barangaY) buying team aron paliton og tag-P20/kilo ang ampalaya, P15 ang class B; talong P15/kilo, okra tig P30 ingon man ang “dynamite” siling kulikot ug kay oversupply ang batong tig P15/kilo lang kuha ani base sa farm gate price sa Tagum City.
“Nagpasalamat gyod mi ni Gob kay gibati niya ang among kalisod ug natabangan mi nga makakita og buyer nga ensakto. Mora’g na-challenge na pod mi otro nga mananum og balik, kay suportado na man sa probinsya,” matod ni Tarcila.
Sa pakighinabi sa Newsline.ph sa Governador gibutyag niini “Kung dili natu tabangan ang atong mga farmers sama ra nga ato silang gidout sa kalisod labina karon nga dunay pandemya.”‘
Gawas sa barangay Semong, nakabenepisyo sab ang mga vegetable farmers sa barangay Gabuyan ug Tiburcia ng wala na maghago ug mogasto aron ibaligya ang ilang gulay sa merkado.
“Dako gyod kaayo ni’g ikatabang sa akong katawhan ilabina sa mga vegetable farmer kay sa niaging mga bulan nga wala pa magsugod ang KAAGAPAY makaingon gyod ko nga perteng luoya kay ubos kaayo ang kumprada sa mga gulay,” pasalamat ni Tiburcia, Barangay Kapitan Celso Quilla nga nagtanom sab og talong.
Ilawom sa KAAGAPAY, ang produktong gulay sa miembro-maguuma kuhaon sa ilahang barangay ug bayaran dayon.-Jiann A. Padillo/Newsline.ph
