DAKBAYAN SA DABAW –— Gihangyo ni Mayor Sara Duterte-Carpio ang mga pamilya nga dunay nagpositibo sa coronavirus (COVID-19) ning dakbayan nga dili manggawas sa ilang balay aron malikayan ang pagkaylap sa kagaw.
Mihangyo si Duterte-Carpio atol sa pakighinabi sa DCDR (Davao City Disaster Radio) nga unta dili manggawas ang mga membro sa pamilya, motabang sa gobierno aron maundang na ang pagkaylap sa kagaw.
Matud sa Mayor, nahibalo sila kung kinsa ug taga-asa ang mga pamilya nga naapektuhaan, hinungdan nga iyang gihangyo ang mga natungdan.
Sa pamilya nga dugay kaso sa coronavirus, angayan nga dili sila mogawas sulod sa katorse ka adlaw (14), dugang sa mayor.
Kung kinahanglan nila ug mga supply, matud ni Duterte-Carpio, tawagan nila ang Covid-19 operation center aron mapadala ang ilang gikinahanglan.
Niadtong Abril 22, aduna pay 160 ka suspetsadong kaso sa coronavirus nga anaa sa Southern Philippines Medical Center (SPMC) ug sa tulo pa ka sentro kung diin didto gipapuyo ang mga individual nga ginaobserbahan.
Gipahinumduman usab sa mayor ang mga molupyo ning dakbayan nga likayan ang pagsige ug gawas sa ilang panimalay kay posibleng matakbuyan sila sa kagaw pinaagi sa mga pangpublikong sakyanan, botika, mga dagkung tindahan, mga banko ug mga pera padala centers.
Gitambagan usab ang mga residente nga likayan nila ang mga barangay nga dunay mga positibong kaso sa Covid-19.-JAP
