OZAMIZ CITY — Duha ka tuig nang gibiyaan sa iyang duha ka mga anak si Nanay Elena Sarbida, 71 anyos, taga barangay Triunfu ning syudad. Gustohon man niya nga pangitaon sila apan wala siyay kuarta ug wala siya masayod asa na ang iyang mga anak.
Nagpuyo si Nanay Elena, byuda, sa usa ka gamay nga barong-barong, nga iya ra usab gitukod, ginamitan sa mga trapal nga iyang nakit-an sa basurahan ug mao na kini ang iyang pinuy-anan.
Wala mahibalo si Nanay asa na ang iyang mga anak kay kalit lang kining mibiya kaniya, apan, duna siya’y pagtoo nga wala na maka-agwanta ang mga anak sa ilang kalisod.
Sumala ni Barangay Kapitan Todik Rosal, ang usa ka anak ni nanay Elena, membro sa Barangay Pulis nga dunay P1,500 nga honorarium kada bulan, apan kalit kining nawala ug ilang nadunggan nga moadto na daw kini sa Manila aron didto manimpalad.
“Ako lang man mag isa kay wala man akong duha ka anak, iniwan ako kaya kahit ano na lang ang gawin ko maghanap ng pagkain o kahit ano” dugang pa ni Sarbida.
Nagpuyo sa kawad-on ug kamingaw si Nanay Elena ug ang labing pait, nabuslot na ang trapal sa iyang balay-balay.
Nakita ni Atty Loueli Talam-Jabinez si Nanay Elena ug sa dihang iyang gipangutana ang tigulang unsa iyang Christmas Wish, mitubag kini nga gusto niya nga dili na buslot ang iyang pinuy-anan.
“ Nakita nako si Nanay nga nanguha og basura, so, akong gipangutana kon asa siya gapuyo, unya misulti siya nga mangayo og trapal kay nagisi na ang trapal nga maoy atop sa iyang gipuy-an naluoy ko so mao tong akong gipost pamasin nga matabangan si Nanay nga dili lang trapal kondi balay jud para naay kapuya-n,” saysay sa Abogado.
Iyang gi-post sa social media ang sitwasyon ni Nanay Elena kung diin nangayo siya og pakitabang aron mabalayan si Nanay Elena, apan pipila lang ka adlaw, may mitubag sa iyang panawagan.
Si Indira Klinken, nga nakabasi sa Germany, nagpadala dayon og kuarta pinaagi sa iyang igsoon nga si Nessa Maquiling, nga maoy mikontak kang Atty, Jabinez ug gipatukuran og balay si Nanay Elena.
Tulo ka adlaw nga gipanday ang balay ni Nanay . May mga tawo usab nga mitabang aron mapadali ang balay ug mahimong regalo ning panahon sa Pasko.
December 24, gidawat ni Nanay Elena ang yawe sa iyang bag- ong balay. Wala niya damha nga ang trapal nga iyang gitinguha, balay ug tindahan ang iyang nadawat.
Sumala pa kang Atty. Jabinez, ang subra sa kwarta nga natigom gikan sa mga donasyon, gipalit sa mga gamit ni Nanay Elena ug gipuhonan aron adunay tindahan para iyang panginabuhian ug dili na siya mamasura pa.
Si Kapitan Rosal nga nakasaksi sa maong higayon uban sa mga sakop sa konseho ug BHW mapasalamaton sa grupo nga Women Empowering Women ( WEW Philippines ) ug sa Misamis Occidental Barter ( MO Barter ) nga nahimong instrumento, kay napahiluna si Nanay ug nahaw-as na siya sa iyang barong barong.
Sa tuyo nga mapatubo ni Nanay Elena ang iyang tindahan, adunay BHW nga giassign si Kapitan Rosal, aron moayuda kang Nanay Elena ug aron dili mawala ang iyang mga baligya ug ang mismong halin niini.
Sumala pa kang Rosal, nga niadtong adunay ayuda gikan sa gobyerno pinaagi sa Social Amelioration Program ( SAP ), si Nanay Elena ang usa sa nakadawat busa nakapalit kini sa iyang pagkaon, apan iyang nahibaw-an nga nawala ang iyang ubang kwarta kay adunay mga tampalasan nga nagbinoang kang nanay Elena didto sa barong barong nga iyang gipuyan.
Ang balay ni Nanay ginama sa kawayan ug amakan, apan ang haligi gisapawan og semento kay nahimutang kini daplin sa dagat nga makahatag og kahayahay kaniya ang hangin.
Mapasalamaton si Nanay Elena ngadto sa tanan nga nakatabang kaniya kay nausab ang kahimtang sa iyang pinuy-anan.
Kini ang unang pasko sa kinabuhi ni Nanay Elena nga sukad siya gibyaan sa iyang mga anak, iyang nasinati ang kamalipayon , komportable sa pagkatulog ug adunay panginabuhian.-Expedita ‘Thata’ Roxas
