DAKBAYAN SA TANGUB, Mindanao— Padayon pang gi-imbestigahan sa kapulisan sa Tangub ang kamatayon sa usa ka grade 2 pupil niadtong Hulyo 3, 2018.
Patay ng nakaplagan ang usa ka grade 2 pupil human nga mabagok ang ulo niini sa sulod sa campus sa Saint Michael’s Elementary School sa Tangub City, niadtong Hulyo 3, 2018, sa may alas 11:24 sa buntag.
Ang ginikanan sa bata parehong Overseas Filipino Workers (OFW), ang amahan, usa ka seaman nga bag-o pa lang nga miabot. Samtang ang inahan sa biktima usa ka OFW sa Hongkong.
Giila sa kapulisan ang pupil nga si Vin Gilcer Saganay, 7 anyos ug nagpuyo sa Santa Cruz, Tangub City.
Sa interview sa Newsline, gipahayag ni Lucena Ferraren, prinsipal sa eskuylahan nga nakadungog sila ug singgit sa waiting area, ug ilang nasayran nga usa ka grade 2 pupil ang misirko gikan sa gibarogan niini ug nabugsok ang ulo nga miigo usab sa bato.
Gidugang sa prinsipal, nga human nga matiurok ang bata, mitindog pa kini og nakalakaw pa og pipila ka lakang, apan kalit nga natumba ug mibula ang baba, hinungdan nga dali nga gitabang ug gidala sa duol nga hospital sa Tangub City apan gideklara sa doctor nga Dead on Arrival (DOA).
Gipasabot sa prinsipal nga nahitabo ang maong insidente atol sa lunch break. Saysay niini nga alas 11:20 ug nagpaabot na lang ang maong bata sa iyang apohan nga motagbo kaniya sa dihang nahitabo ang maong insidente, mga alas 11:24.
Gidugang sa prinsipal nga adunay usa ka tinun-an ang nakasaksi sa pagka-sirko sa biktima.
Una niini mireklamo ang biktima nga nagsakit ang iyang tiyan hinungdan nga iyang gipaod ang tiyan sa lingkoranan apan nawala ang balance ug nalahos kini hinungdan nga nabugsok ang ulo sa bato.
Apan lahi ang pagtuo sa uyoan sa biktima. Gipadayag ni Ceriaco Saganay, Jr., uyuan sa maong grade 2 pupil nga posible nga adunay pagpasagad ang tagdumala sa eskuylahan.
Dili siya kumbinsido nga ang pagkabagok sa ulo ang hinungdan sa kamatayon sa bata, tungod kay aduna silay nakuha nga inpormasyon nga bandang alas 9 sa buntag adunay bata nga nahagbong sa slides sa playground sa eskuelahan.
Apan wala masayri kon si kinsa nga bata ang nahagbong. Saysay ni Saganay nga posible ang iyang pag-umangkon ang nahagbong anang buntag ug mga alas onse na mi-epekto ang kadaot hinungdan nga namatay kini.
Saysay sa uyoan, nga kon gipaayo pa unta ang slides sa playground wala untay ma disgrasya. Hinungdan nga nanawagan siya nga mahatagan og hustisya ang kamatayon sa bata ug mogawas ang tinuod.
Apan gipasabot sa prinsipal, nga walay kamatuoran nga adunay nahagbong nga bata sa slides tungod kay wala may nareport sa iyang buhatan.
Dugang niini nga kon adunay mahagbong dili gyud ni malilong kaniya tungod kay dali ra mamatikdan kay adunay daghan nga mga estudyante nga mosumbong dayon sa mga magtutudlo.
Tinguha karon sa mga tagtungod nga ipa-autopsy ang lawas sa bata.
hangtud karon nagpadayon pa ang imbistigasyon sa kapulisan sa Tangub City.-Neptalie Batolenio/NewsLine.ph
