DAKBAYAN SA DABAW — Kinsay magtuo nga ang basketbolista sa Philippine Basketball Association (PBA) kaniadto usa sa mga Filipino frontliner nga nakig-gubat sa gikahadlukang coronavirus disease (Covid-19) didto sa United Kingdom (UK) karon.
Si Mike Mustre, kanhi magdudula sa San Miguel Beer sa PBA, nag-ingon sa interbyu sa ANC nga siya health worker na karon sa UK kauban sa iyang asawa.
Matud pa ni Musre, kinsa nidula sa PBA gikan 1995 hangtud 2002, siya ug ang iyang asawa nagrisgo sa ilang mga kinabuhi kada adlaw aron makatabang sa pag-atiman sa mga Covid-positive nga mga pasyente.
Ang UK kasamtangang adunay 98,500 ka kumpirmadong kaso sa Covid-19 ug aduna na’y 12,800 ka nangamatay tungod sa maong virus.
Ang kanhi San Miguel player nga nakadaug og lima ka kampyonato sa PBA, nagtrabaho na karon isip operating room healthcare assistant sa Neuro Department sa St. George’s University Hospital sa London, samtang ang iyang asawa usa ka Intensive Care Unit nurse sa usa ka pribadong tambalanan.
“Sa ngayon maraming mga COVID patients talaga, dumadami,” sulti ni Mustre. “So lahat kami naka-full gear na talaga para safety sa lahat ng staff.”
Bisan og naka-assign siya sa Neuro Surgery Department, ingon ni Mustre aduna gihapon siya’y direkta nga kontak sa mga Covid nga pasyente.
“Direct din kasi kami sa pasyente. Kapag dinala sa loob ang pasyente hahawakan mo pa rin kasi ililipat mo sa table para operahan,” ingon sa 52-anyos nga si Mustre.
Tungod sa ka risgo sa iyang trabaho, kinahanglan siyang magbantay ug gibati usab sya’g kahadlok.
“Siyempre may takot din talaga,” pangangkon ni Mustre. “Kasi di mo alam sino ang kalaban. Ngayon kung na-meet mo ang isang tao na akala mo wala pero sa sunod na araw positive pala. So doble ingat talaga.”
Gisugdan ni Mustre ang iyang bag-ong bokasyon niadtong 2011 human siya nibiya sa nasud niadtong 2007.
Kung matagaan og higayon, gusto ni Mustre nga makabalik og eskwela ug mokuha og nursing, o di ba kaha medicine nga kurso.
Pulong pa ni Mustre, dili magdugay ang usa ka tawo sa basketball, pero sa medikal nga propesyon molungtad ang usa ka tawo tungod
sa iyang pagtabang sa mga masakiton. (LBG)
