TAAS-TAAS pa gyud ang panahon nga paaboton sa mga Pilipino para makadula og balik og basketbol.
Kini gumikan kay ang Philippine Sports Institute sa Philippine Sports Commission (PSC) miluwat og matrix nga ginganlan og “Framework Tool for Reintroducing Sport in a Covid-19 Environment” nga nagtugot lamang sa pagdula og lima-limang (5-on-5) basketbol kung malibkas na sa hingpit ang kwarentina.
Ang maong lagda nagtugot lamang og mga “ball and skill drills” sa tungod sa panimalay o sa gawas sa dalan atubangan sa balay ngadto sa mga lumolupyo sa National Capital Region ug sa mga lugar nga naa ubos sa Modified Enhanced Community Quarantine (MECQ).
Hinuon, ang mga nagpuyo sa mga dapit nga naa ubos sa General Community Quarantine (GCQ) makahimong makadula og inusara sa pampublikong basketball court, apan dili sila mahimong makighalobilo sa ubang tawo o magpahulam sa ilang gamit.
Ang mga dula nga gitugotan sa mga lugar nga naa sa MECQ mao ang badminton, running, kata sa karate, solo cycling, ug open-water swimming.
Ang indoor swimming gitugotan sa mga dapit nga naa sa GCQ, apan gikinahanglan nga ang swimming pool adunay walo ka lanes ug gidili usab ang pakighalobilo sulod sa shower rooms o ilisanan.
Sa pakig-alayon sa Department of Health ug sa Inter-Agency Task Force, ang PSC mibuhat sa maong mga lagda aron magiyahan ang katawhan sa mga klase sa dula nga gitugotan ubos sa kwarentina.
Ang tanang National Sports Associations gihatagan og kopya sa maong matrix nga mahimo nilang sumbanan sa paggama sa ilang mga kaugalingong lagda. (LBG)
