DAKBAYAN SA OZAMIZ — Misaka ug kalit ang ihap sa kaso sa Coronavirus-19 sa Ozamiz tungod sa lokal transmisyon ug sa pagpalapad sa contact tracing nga ginahimo sa lokal nga panggamhanan.
Sa unsa ka press conference, gibutyag ni Mayor Fernando “Ando” Oaminal nga ang lokal transmisyon ang nakadugang sa kaso sa Covid-19 sa iyang lungsod ug tungod usab kay ilang gipalaparan ang contact tracing.
Sa maong interbyu, gipadayag sa Mayor nga gumikan kay daghan na nga mipauli nga mga Locally Stranded Individual ( LSI ) sa Ozamiz, nakasulod usab ang mga nag-positibo sa COVID19 sa Ozamiz.
Apan, giklaro ni Oaminal, nga kinahanglan usab nga dawaton niya ang mga namauli nga residente tungod iya man kining mga sakop.
Apan, naay mga badlungon nga anaa sa isolation facility, nga imbis magpuyo lang sa sulod sa ilang kuarto sulod sa 14-ka adlaw, modalikyat gayud ug gawas sa tindahan.
“Mogawas gikan sa isolation facility unya moadto sa tindahan,” saysay sa Mayor.
Ang pait, kay pag testing sa LSI, nagpositibo kini, ug pila ka adlaw ang milabay, nagpakita na usab og sintomas ang tindira ug uban pang naka-close contact sa LSI, didto nagsugod ang lokal transmisyon.
Matud ni Oaminal, gawas sa lokal nga trasmisyon, mitaas ang kaso tungod kay ilang gipalapdan ang ilang pag-testing sa mga suspetsadong kaso “Atong gipalapdan ang contact tracing ug ang testing, maong daghan ang nagpositibo”.
Ang pagpalapad sa testing usa ka paagi kung diin mahibaw-an sa gobierno ang mga dunay Covid-19 ug dali kining mapadala sa isolation facility ug makatabang sa pagpugong sa pagkaylap sa maapektuhan.
Sama ni Mayor Oaminal, problema usab sa dakbayan sa Dabaw ang mga LSI ug mga returning Filipinos (ROFs) ug uban pang anaa sa quarantine facility, kay maningkamot kini nga mogawas ug kumpiansa ra kaayo kay kuno dunay paliton, ug sa dihang gi-test kini, nagpositibo mao nga mikaylap ang natakdan sa Covid-19 nga kagaw.
Sumala ni Mayor Duterte-Carpio “Mamakak ug modalikyat gayud ug gawas ang naa sa quarantine facility, mo-ingon nga naay paliton, unya paggawas sa resulta sa swab test-nagpositbo-diha karon ang problema kay nagtakud-takud na.”
Ang ponto ni Oaminal ug ni Duterte-Carpio nga unta, ang mga naa sa isolation facility dili mamakak ug dili usab mogawas aron kung pananglitan nagpositibo sila, wala silay matakdan, tungod kay mas modaku ang problema sa contact tracing ug mas modaghan ang matakdan.”
Sa Ozamiz City, gigamit nga isolation facility sa usa ka building nga wala na nagamit ug subay sa giya sa Departmetn of Health, ang pasilidad kompleto ug gamit ug gipangbutangan kini og division, basi sa guideline sa DOH ug aduna kini mga kasilyas ug katre aron mamahimong komportable ang mga temporaryong mopuyo sa mga lawak niini. –Expedita “Tata” Roxas
