DAVAO CITY (September 23) – Gidakop sa National Bureau of Investigation-Southeastern Mindanao (NBI-Semro) ug Professional Regulation Commission (PRC) XI ang usa ka maestro sa pribadong tunghaan sa Davao City nga nagsilbi nga watcher sa Licensure Examination for Teachers (LET) human masakpan nga nagkuha og hulagway sa test questionnaire niadtong Domingo, Setyembre 21, 2025.
Nasakmit sa mga otoridad ang cellphone nga gigamit sa suspek sa pagkuha og litrato, nga magamit karon isip ebidensya sa kaso nga ipasaka batok niya. Anaa na karon sa kustodiya sa NBI ang maong maestro.
Sumala sa PRC XI, hugot nga gidili ang pagdala ug paggamit og bisan unsang gadgets sulod sa examination area, ilabi na ang cellphone. Kinahanglan kini ideposito sa gawas sa test venue. Apan nakalusot ang suspek sa duha ka cellphone ug usa ra ang iyang gideposito, samtang ang usa gigamit sa pagkuha sa mga exam questions.
Gipahayag sa PRC nga matag board examination, lain-lain ang sets sa mga pangutana aron malikayan ang leakage ug cheating. Bisan pa, seryoso nila kining gidawat ug giingon nga dili nila palampason ang sala sa suspek.
Giimbestigahan pa sa NBI ang posibilidad nga adunay kakunsabo ang maestro, lakip na ang usa ka review center sa syudad nga gitudlo nga posibley nakadawat sa mga hulagway kapalit og bayad. Posible silang isyuhan og subpoena aron maimbestigahan.
Atubangon sa suspek ang kaso nga paglapas sa Republic Act 8981 o PRC Modernization Act of 2000, diin posible siyang makasuhan ug mawad-an og lisensya isip maestro.
