DAKBAYAN SA DABAW —- Nagpositibo sa Covid-19 si Malabang, Lanao del Sur Mayor Mohammad Yahya Macapodi.
Ang pag-anunsyo ni Macapodi nahitabo pipila ka oras human gi-anunsyo ni Lanao del Sur Governor Mamintal Adiong Jr., nga siya nagpositibo sa coronavirus.
Sa iyang opisyal nga pamahayag, gi-anunsyo ni Mayor Mohammad Yahya Macapodi, nga nakasinati siya og gamay nga simtomas ug gitambagan nga magpailawom sa usa ka swab test.
“Nakontak ako ug gipahibalo nga ang akong resulta migawas nga positibo sa Covid-19,” matud ni Macapodi.
Gilayong gihimo ang contact tracing aron daling magpungan ang pagkaylap sa kagaw.
Nanawagan si Macapodi “Giawhag nako ang tanan nga adunay direkta nga kontak kanako niadtong milabayng semana nga magpailalom sa 14 ka adlaw nga quarantine.”
Anaa na karon sa Amai Pakpak Medical Center sa Marawi City si Macapodi ug padayong ginatambalan.
Samtang, nagpositibo usab sa Covid-19 ang BARMM Health Minister nga si Dr. Saffrullah Dipatuan ug Youth Commission Chaiman nga si Marjanie Macasalong.
Sukad niadtong Lunes, ang BARMM nakatala og 792 ka kaso sa Covid-19 ug 213 niini ang aktibong nga kaso samtang 555 nga nakarekober, ug 24 ang namatay.-Winkle Mae M. Tabuclao/Newsline.ph
