DAKBAYAN SA DABAW —- Pormal nang giabrihan sa publiko ag bag-ong merkado publiko sa lungsod sa San Isidro, Davao del Norte niadtong Martes, Agosto 18.
Ang okasyon gipangulohan ni Mayor Arnel H. Sitoy kauban si Vice Mayor Baltazar L. Cuyos, mga SB Members ug mga Department Heads sa Lokal nga Panggamhanan.
Ang pag abri sa merkado publiko maoy usa sa mga lakang sa lokal nga Panggamhanan aron suportahan ang mga lehitimong negosyante nga dugay na nga nangandoy nga aduna na silay permanente nga display area para sa ilang mga produkto.
Dugay nang gidamgo sa katawhan sa San Isidro nga adunay na silay duol nga palitanan ug mga panginahanglanon sa adlaw adlaw labi na ang mga pagkaon sama sa isda, karne, gulay, bugas, ug uban pa.
Dako usab ang tabang niining pag abre sa maong merkado para malikayan nga matakboyan sa COVID-19 Virus ang katawhan tungod kay dili na nila kinahanglan nga mobyahe ug moadto pa sa laing lungsod para mamalit ug mga pagkaon.
Sa iyang pamulong atol sa okasyon, gibutyag ni Sitoy nga ang kuarta nga gigamit alang sa proyekto kuarta gikan sa katawhan sa lungsod, mihangyo kini sa mga negosyante nga siguraduhon nga pirmi limpyo ang ilang palibot aron malikay ang katawhan sa mga sakit.
Gimandu usab sa Mayor ang hugot ang pagtuman sa mga health protocols aron malikayan ang coronavirus -19.
