DAKBAYAN SA DABAW — Ang mga adunahan sa nasud nga tig-gama og mga alak ug mga pahumot, nagkasinabot nga maghimo sila ug alcohol, hand sanitizers ug uban pang mga produkto ug ila kining ihatag sa gobierno aron makatabang nga malikayan ang pagkaylap sa novel coronavirus disease (COVID-19).
Sa taho nga gipagawas sa Philippine Star, gibutyag niini nga ang mga adunahan nga nanag-iya ug paktorya sa alak motabang sa gobierno sa kampanya batok COVID-19.
Ang Brandy King, nga si Andrew Tan sa Alliance Global Group Inc, (AGI) nga tig-gama sa Emperador brandy ug founder sa Megaworld, nag anunsyo pinaagi sa iyang anak nga si Keven Tan, nga mohatag sila og usa ka milyonn (1-million) ka litro nga 70 percent Ethyl Alcohol (disinfecting alcohol) alang sa mga frontliners sama sa mga doktor, nurses, medical staff , sa kasundaluhan ug mga pulis.
Sumala ni Tan, mohatag sila ug 850,000 ka litro nga 96 percent Ethyl alcohol aron magamit kini sa paglimpyo ug pag disinfect, ug kini ang ilang bag-ong negosyo nga mamahimong kumpetisya sa Green Cross, Casino, ug Family alcohol.
Samtang si Bernard Arnault, ang tag-iya sa French Conglomerate nga LVHM Group, ang tig-gama ug mga pahumot ug mga mahalong gamit sama sa Louis Vuitton, Givenchy and Christian Dior, nagbutyag nga magpagawas sila ug alcohol-based sanitizers aron itabang sa pagbatok sa COVID-19.
Si Arnault una nang nabantog isip usa sa mga pinakadatu sa kalibutan, naghatag usab ug 200-million Euro alang sa nasunog nga Notre Dame Cathedral didto sa Paris.
Si Ramon Ang, ang gibantog nga ‘Gin” ug “beer” king nga ang presidente ug chief operating officer sa San Miguel Corporation nag anunsyo nga iyang himoun ang usa niya ka planta aron makagama ug daghan nga disinfectant alcohol para ipanghatag sa mga local government units ug mga hospital sa nasud aron sa pakigbatok sa COVID-19.
Matud ni Ang, ang iyang kumpanya maghimo ug 70 percent nga ethyl alcohol nga puede himoung sanitizer ug magamit sa uban pang medikal nga panginahanglanon.
Nagplano ang San Miguel nga mohatag ug binulto nga tag 20-litro ug tag 1,000 ka litro nga alcohol.
Maghatang usab kuno si Ang ug ‘disinfectant powder’ nga ilang ginama- ug kini ipanghatag sa mga mag-uuma nga nagbuhi ug baboy.
Ang ilang lakang dakung tabang alang sa gobierno ug sa katawhan.-ezc/Newsline
