DAKBAYAN SA OZAMIZ, Mindanao— Gi-aresto ang security guard sa usa ka kolehiyong tulunghaan, human sila naaktuhan nga naglubong og klase-klaseng kalibre sa armas, kaniadtong Domingo sa gabii, Mayo 6, 2018.
Ang security guard giila ni Police chief inspector Jovie Espenido, hepe sa Ozamiz City PNP, nga si Cristopher Alviar, 37, minyo, security guard, ug nagpuyo sa Purok 5, Banadero, Ozamiz City og si Allan Donaoto.
Sumala sa kapulisan, kaniadtong Domingo sa gabii, nakadawat sila ug tawag gikan sa usa ka Claudio Ranara, retiradong membro sa Philippine Marines, ug kasamtangang disciplinary officer sa Misamis Institute of Technology Incorporated (MIT), ug nagpahibalo nga duha sa ilang guardiya adunay gilubong sa yuta nga mga armas.
Ang MIT, Incorporated anaa mahimutang sa Purok 10, Banadero, Ozamiz City.
Human nga madawat sa kapulisan ang taho, ila gilayon giadto ang lugar ug ilang naaktuhan ang duha ka security guard nga sila si Alviar ug si Donaoto nga naglubong og mga armas sulod sa compound sa eskuelahan.
Sa dihang miduol na ang kapolisan mikalit og dagan sa si Donaoto sa luyong bahin sa eskuelahan ug nakaikyas kini, apan nasikop si Alviar.
Gipakalot sa kapulisan ang gilubong sa duha, ug ilang nakubkob ang 3 ka .38 caliber nga revolver; 9 ka 12-gauge shotgun; 2 ka short steel magazine sa M16 rifle; 36 ka bala sa M16; lima ka bala sa 12-gauge shotgun; lima ka bala sa .38 caliber revolver ug duha ka 40mm rifle grenade.
Nakuha gikan sa posisyon ni Alviar ang usa ka .45 caliber pistol uban ang duha ka magazine nga adunay 14 ka mga bala.
Lakip sa nakuha sa PNP ang duha ka empty steel magazine; ug laing 46 ka mga bala sa caliber .45 nga pistola.
Nasayran nga ang duha ka mga security guards kanhi sakop sa MROP Security Agency, nga gipanag-iyahan sa sa nagtago-tago nga si kanhi Board member Ricardo Parojinog.
Wala usab mohatag og pahayag ang nasikop nga security guard.
Ang MROP securtity agency miundang na sa iyang operasyon sukad nagtago-tago na si Parojinog.
Si Alviar og Donaoto, empleyado sa MI.
Sa iyang kabahin, gipadayag ni Engineer Galileo Maglasang, tag-iya sa MIT, Incorporated nga ilang gikakurat ang maong hitabo apan nagpasalamat sila nga nadiskorehan sa kapolisan ilabina nga nameligro ang ilang maong eskuylahan sa explosibo nga giapil sa paglubong.-Neptalie Batolenio/Newsline.ph
