DAKBAYAN SA OROQUIETA (Mayo 31) —GITUOHANG gibilin sa wala mailang mga tawo ang mga eksplosibo sa daplin sa dalan sa Purok 3, Barangay Villaflor, Oroquieta City.
Usa ka John Dale Mejaro Acaac, 22 anyos, ulitawo, nagpuyo sa Puntod, Lopez Jaena, Misamis Occidental ug trabahante sa MBD Construction ang nakakita sa maong mga explosibo.
Gipadayag ni Police Superintendent Allan Ruba, hepe sa PNP Oroquieta City nga dali nga mireport sa ilang buhatan si Acaac sa nakita nga mga explosibo sa daplin sa dalan.
Nasayran nga ang mga empleyado sa MBD construction nagpahigayon sa road widening sa Calamba-Oroquieta Monatin road hinungdan nga nakita-an ang gituohang gibiyaan nga mga explosibo.
Sa pagresponde sa kapolisan sa Oroquieta nakita ang usa ka sako sa duol sa may kasagbutan nga bahin sa daplin sa dalan nga adunay sulod nga mga explosibo.
Nakita sa sulod sa sako ang siyam ka rifle grenade, 4 ka M2O3 cartridges ug mga wires.
Gumikan sa maong nakita, mitawag ang PNP Oroquieta sa 10th Infantry Batallion nga naghangtyo ug sakop sa Explosive Ordnance Disposal (EOD) Team.
Gidugang ni Ruba nga sa imbestigasyon, posible nga adunay plano nga pagpang-ambush sa government personnel, miltar o mga polis nga moagi sa maong dapit.
Nasayran nga ang base headquarter sa 10th IB Philippine Army anaa mahimutang sa Barangay Burgos, Oroquieta City mga napulo ka kilometro sa dapit nakit-an ang mga pabuto o explosibo.
Sa paghimo niining balita ang 10th IB Philippine Army padayon pa nga mihimo og imbestigasyon sa nakitang explosibo. -Neptalie Batolenio/NewsLine.ph
