DAKBAYAN SA DABAW (April 2) — Usa ka nars nga namaligya ug buaya gi aresto sa mga operatiba sa National Bureau of Investigation (NBI) dinhi sa dakbayan alas-3 sa hapon kagahapon, Abril 1, didto sa Victoria Plaza, car park sa Bajada.
Giila sa NBI ang nars nga si Mark Lester Bringas, 30 anyos nga taga Kapalong Davao del Norte.
Ang operasyon giusad human nakadawat ug impormasyon ang National Bureau of Investigation 11 nga dunay gabaligya nga buaya ug mga itlog niini.
Lima ka mga buaya (upat niini ang salt water crocodile ug usa ka fresh water crocodile) apil ang upat ka mga itlog sa salt water crocodile.
Sumala sa usa ka NBI Agent nga 15mil pesos matag usa ang baligya ni Bringas sa buaya ug singko mil pesos sab ang matag usa ka itlog.
Apan nagdumili ang suspek sa pagbutyag ug asa niya ginakuha ang mga buaya, duna lang kunoy ga deliver sa iyaha ug nasayod siya nga bawal ang iyang ginahimo.
Gi-turn over sa crocodile park ang mga buaya asta ang mga itlog, samtang kasong pagsupak sa Republic Act 9147 o Wild life Act ang suspek nga si Bringas. –Reeya Nuñez/Newsline.ph
