ANG MGA magdudula sa National Basketball Association (NBA) mahimo nang makabalik sa ilang pag-ensayo karong Mayo 1.
Hinuon, ang mga player nga tugtang mobalik pag-ensayo kadto rang mga miyembro sa team sa mga lugar nga gipalu-agan na ang ilang “stay-at-home” protocol.
Ang mga estado, o state, nga nagpalu-ag na sa ilang kwarentina mao ang Georgia ug Oklahoma.
Ang mga basketbolista sa Atlanta Hawks, nga naa sa Georgia, ug sa Oklahoma City Thunder mahimo nang mobalik sa ilang mga training gym karong Mayo 1.
Ang Estado sa Florida. kung diin nagbase ang Miami Heat ug Orlando Magic, gikatakda usab nga mopalu-ag sa ilang kwarentina puhon.
Hinuon, ang NBA nag-ingon nga ang training limitado ra sa “personal workouts” ug dili pa mahimo ang pag-ensayo sa tibuok team.
“Any workout that take place would be voluntary and be limited to individual sessions only,” sumala pa sa pamahayag sa NBA sa ilang website.
Ang pagbukas og balik sa mga training facility wala hinuon magpasabot nga magpadayon pa ang NBA season. LBG
