DAKBAYAN SA DABAW — Giawhag ni Solicitor General nga si Jose Calida niadtong Biernes ang Korte Suprema nga ibasura ang petisyon nga nag-agni sa pagpagawas sa mga nabilanggo nga mga rebeldeng komunista.
Matud pa ni Calida, ang petisyon angayan nga ibasura tungod kay wala kini’y igong pasikaranan ug makahimo kini og dako nga inhustisya dili lamang sa pamilya sa mga nabiktima kundili sa tibuok katawhang Pilipinhon.
Si Calida nag-ingon nga dili tinuod ang pangangkon sa mga petisyoner nga sila mga “political prisoner” kay sila nabilanggo tungod sa mga kalapasan nga walay labot sa politika.
Lima sa 22 nga petisyoner nag-atubang og 15 ka kaso sa pagpatay tungod sa ilang kalambigitan sa masaker didto sa Inopacan, Leyte, kung diin napalgan ang mga bukog sa 68 ka mga tawo niadtong 1992.
Pulong pa ni Calida, ang 68 ka mga patay mga biktima sa “internal cleansing” nga gihimo sa Communist Party of the Philippines-New People’s Army-National Democratic Front (CPP-NPA-NDF).
Ang CPP-NPA anaa nalakip sa listahan sa mga organisasyong terorista dili lamang sa Pilipinas kundili apil didto sa Estados Unidos, European Union, United Kingdom, Australia, Canada, ug New Zealand.
“The petitioners are all valuable members of the terrorist organization,” sulti ni Calida.
Ang petisyon gipasaka ngadto sa Korte Suprema niadtong Abril 8 sa mga taga Public Interest Law Center ug National Union of People’s Lawyers alang sa ngalan sa 22 ka mga piniriso, nga giingong hinikawan sa kagawasan (persons deprived of liberty).
Ang mga petisyoner giila nga silang: Dionisio S. Almonte, 62; Ireneo O. Atadero Jr., 57; Alexander Ramonita K. Birondo, 68; Winona Marie O. Birondo, 61; Rey Claro C. Casambre, 68; Ferdinand T. Castillo, 60; Francisco O. Fernandez Jr, 71; Renante
Gamara, 62; Vicente P. Ladlad, 70; Cleofe S. Lagtapon, 66; Ediesel R. Legaspi, 62; Adelberto Silva, 72; Alberto L. Villamor, 63; Virginia B. Villamor, 65; Emmanuel Bacarra, 55; Oliver Rosales, 48; Oscar Belleza, 63; Norberto A. Murillo, 66; Dario Tomada, 60; Lilia Bucatcat, 73; Ge-ann Perez, 21; ug Reina Mae Nasino, 22. (LBG)
