DAKBAYAN SA DABAW — Ang Davao City Government mipasalig nga padayon ang ilang pagpanghatag og bugas sa mga Dabawenyo ubos sa General Community Quarantine (GCQ) hangtud nga aduna pa’y supply ang lokal nga kagamhanan.
Si Mayor Sara Duterte nag-ingon nga padayon silang mohatag og tabang samtang wala pa mahurot ang supply sa City Government.
“Tabangan gihapon nato sila until naa pa, until makahatag pa ta og bugas para ma-augment ang ilahang pagkaon diha sa sulod sa ilang mga balay,” pasalig ni Inday Sara sa mga Dabawenyo miaging semana.
Natapos na sa lokal nga kagamhanan ang ika-upat nilang hugna sa pagpanghatag og bugas ngadto sa 182 ka mga barangay, apan mipasalig ang mayor nga dili mahunong ang hinabang nga bugas hangtud ang dakbayan naa pa sa kwarentina.
Ang mga barangay nga daghan ang populasyon nakadawat og mas daghang sako sa bugas.
Sa 182 ka mga barangay, upat niini ang nakadawat og tag-30 ka sako sa bugas, lima ang nahatagan og tag-25 ka sako, 13 nahatdan og tag-20 ka sako, 78 nakakuha og tag-15 ka sako, ug 82 ka barangay ang nakadawat og tag-10 ka sako sa bugas.
Ang mga miyembro sa “lesbian, gay, bisexual, and transgender” (LGBTQ) community mitabang usab sa pag-apud-apud sa mga sinakong bugas nga hinabang.
Ang mga LGBTQ volunteer nakahatag og 38,850 ka mga putos sa bugas ngadto sa 149 ka mga barangay.
Sa laing bahin, si Duterte mipasabot nga mikunhod na ang gidaghanon sa bugas nga ilang gipanghatag, kini tungod kay daghan nang mga Dabawenyo ang nakabalik sa trabaho.
“Gi-reduce nato because GCQ na man. So dunay uban sa atoa nga namalik na sa trabaho, therefore they can expect nga aduna sila’y sweldo,” matud pa ni Mayor Sara.
Dugang usab sa mayor nga unahon paghatag og bugas ang kadtong mga Dabawenyo nga wala pa gihapon makatrabaho. (LBG)