DAKBAYAN SA OZAMIZ —Wala na makaiktad pa ang usa ka notadong kawatan nga taodtaod na nga gipangita sa kapolisan atol sa gihimo nga entrapment operation.
Giila ni Police Major Peter Revillas, acting chief of police sa Ozamiz PNP ang suspek nga si Alejandro ‘Larry’ Gadot, 56, walay trabaho, aduay postal address nga Alangilan, Sagay, Camiguin Province ug kasamtangan nga nagpuyo sa Purok 1, Calabayan, Ozamiz City.
Nasayran nga human nga makadawat og daghang reklamo ang kapolisan nga adunay tig-pangawat sa mga kargamento ug mga groceries sa nakaparada nga sakyanan gihimo gilayon ang entrapment operation.
Kaganiha, Hulyo 23, akto nga nasakpan ang suspek human nga gikawat niini ang gipaon nga duha ka karton nga grocery items sa likod sa pick up truck nga giparada atbang sa usa ka grocery store nga nahimutang sa Gomez-Capristrano St., Ozamiz City.
Gipadayag ni Police Captain Dennis Tano, intelligence officer nga taodtaod na usab nila nga gi-surveillance ang maong suspek.
Sa iyang kabahin, gipadayag sa suspek nga si Gadot nga ikaduha pa lamang kini nga hugna nga iya kining nahimo tungod sa kalisod. Giangkon usab niya nga siya nakonbikto na sa kasong pagpatay ug nagtrabaho siya sa Iligan City isip us aka machine chop helper sa isang ig-agaw.
Samtang gipasabot usab ni Tano nga makadaghang higayon na nga nakapangawat si Gadot sa maong dapit sibo sa CCTV footage nga gihuptan sa kapolisan.
Giandam na ang kasong ipasaka ngadto sa suspetsado.-Neptalie Batolenio
