OZAMIZ CITY— Gilayong gimando ni Ozamiz City Mayor Sancho Fernando ‘Ando’ Oaminal nga ipasira ug walay trabaho karong adlawa lang, Septyembre 11 , ang City Hall human nagpositibo ang duha ka empleyado sa Coronavirus disease (COVID-19).
Gipadayag ni Mayor Oaminal nga gisuspenso ang trabaho aron mapailalom sa disinfection ang tanang mga opisina ug ang palibot sa City Hall.
Samtang ang duha ka mga empleyado nga nagpositibo ang gibutang na karon sa isolation facility sa dakbayan.
Kasamtangan nga gipahigayon na usab ang contact tracing sa duha ka mga empleyado.
Wala usab mihatag og idetalye ang mayor kung sa unsang buhatan nagtrabaho ang duha ka mga empleyado.
Sa kinatibuk-an ang Ozamiz City aduna nay 97 ka mga nagpositibo sa COVID-19, 71 niini ang naka-recover ug adunay 26 ang kasamtangan nga anaa sa isolation facility ug adunay usa ka namatay.
Gumikan niini padayon ang panawagan ni Mayor Oaminal sa tanan sa pagsunod sa health protocols, pagsuot og face mask ug social distancing.
Ang Ozamiz City ang naa pa gihapon ilalom sa Modified Community Quarantine (MGCQ). –Neptalie Batolenio/Newsline.ph
