DAKBAYAN SA DAVAO—Gisusi na karon sa National Security Council ang gikatahong pagdagsang sa mga estudyantemg Insik sa Probinsya sa Cagayan.
Kini human nabaniog nga gidagsa sa mga estudyante nga gikan sa China ug nagpalista sa usa ka lokal nga pribadong eskwelahan sa Cagayan.
Gipanghimakak sa mga pribadong institusyon sa higher education sa Cagayan ang mga taho bahin sa giingong pagdagsa sa mga estudyanteng Chinese sa probinsiya.
Sa hiniusang pahayag, ang hingtungdan nga mga kolehiyo ug unibersidad miingon nga adunay 486 lang ka langyaw nga mga estudyante sa St. Paul University Philippines sa Tuguegarao City.
Sa pahayag sa Chinese Embassy sa Pilipoinas, gisaysay niini nga walay basehan ang mga balita ug kini nagdugang lang sa kagubot tali sa Pilipinas ug China.
Ang pagsusi nagtumong aron mahibal-an kung ang ilang presensya usa ka hulga sa seguridad, sumala ni NSC Assistant Director Jonathan Malaya sa usa ka news forum sa Quezon City niadtong Sabado.
“Ang atong intelligence units gi-assign nga motan-aw sa sitwasyon didto (Cagayan) para alamin kung tinuod ba ni nga hulga sa nasudnong seguridad, o kaso lang sa mga estudyante nga gustong moadto sa Pilipinas aron magtuon,” dugang ni Malaya.
Matud pa ni Malaya nga adunay daghang mga isyu nga kinahanglan nilang sulbaron labot sa presensiya sa mga tinun-an sa China, apil na ang ilang gidaghanon kay daw sukwahi kini sa mga taho sa Bureau of Immigration (BI) ug intelligence reports.
sa report sa Bureau of Immigration usa ka gatos ang mga estudyante nga gikan sa China, apan, dunay nagsulti nga usa ka libo.
“So, kini usa ka butang nga karon giimbestigahan karon. Bisan ang Kongreso mohimo sab sa ilang imbestigasyon, pero ato nang gitan-aw,” matod ni Malaya.
