DAKBAYAN SA DABAW (Agosto 2) — Sangko sa langit ang kalipay ni Celedonio Rapis sa dihang giabrihan pag usab ang lotto outlet sa Maa ning dakbayan niatong Mierkules sa buntag, Hulyo 31.
Ang pangbalik sa operasyon sa lotto gihimo human mi-apila ni Philippine Charity Sweepstakes Office general manager Royina Garma kang Presidente Rodrigo Duterte nga ipadayon ang lotto tungod kay daghan ang maapektuhan nga mga proyekto sa gobierno ug daghan usab ang mawad-an ug trabaho, samtang aduna usab kini legal nga implikasyon.
Matud ni Garma, ang sistema nga ilang ginagamit aron ma monitor ang operasyon sa lotto limpyo ug layo sa korapsyon.
Gimandu ni Duterte ang pagpasira sa tanang operasyon sa lotto, Small Town Lottery ug uban pang mga pagpadula nga adunay prangkesa gikan sa PCSO, niadtong milabayng Biernes, human migawas sa imbistigasyon nga grabe ang korapsyon sa pagpadagan niini.
Sumala sa taho nga nakuha sa NewsLine.ph, adunay mga operator sa STL ug pick-3 nga dula nga maghimo-himo ug ‘draw’ sa mga rehiyon, ug mugna-mugna lang sa nagdumala ang mogawas nga numero aron wala makatama sa midaug nga resulta, ug makabig nila ang kita.
Daghan usab ug kita ang wala mahatag sa gobierno ug ang pipila dili mosulti sa tinoud nga kita sa ilang pagpataya.
Ang pagpasara sa lotto outlets nakahugno sa mga tayador ug sa iyang pag-abri ug otro daghan ang nalipay.
“Kanang kada adlaw nakong pagpatad sa lotto, mao ra jud na ang akong kalingawan kay wala man koy lain kalipay,” saysay ni Jenelito Hernael, 75 anyos.
Nahimo na kuno niyang ehersisyo ang pagbaktas kutob sa lotto outlet kada adlaw aron mopusta sa iyang numero nga patdan.
Sa unang pag-abri sa mga estasyon sa lotto, daghan ang nalipay kay naa na usab kuno silay atangan nga resulta sa telebesyon samtang nangandoy sa ilang kadaugan.-jap
