DAKBAYAN SA MATI-– Nakumpleto na sa Department of Social Welfare and Development (DSWD) ang pagpanghatag sa P6,000 nga ayuda gikan sa Social Amelioration Program sa gobyerno ngadto sa kapin 64,000 ka pamilya sa Davao Oriental.
Kini ang gibutyag ni Social Welfare and Development officer Reynante Cruz karong Biyernes, Mayo 15.
Matud pa ni Cruz, natapos nila ang pagpanghatag sa SAP ngadto sa 64,344 ka pamilya sa napulo ka lungsod sa probinsiya miagi pang semana.
Gibutyag usab ni Cruz nga adunay mga nakadawat sa SAP nga boluntaryong miuli sa ilang nadawat nga ayuda tungod kay dili sila kwalipikado sa maong programa.
Mapasalamaton si Cruz sa mga tawo nga miuli sa ilang nadawat nga hinabang ug nagpahibalo nga ila nang gisugdan og pang-apud-apud ang mga gipang-uli nga salapi ngado sa ubang angayan nga modawat sa ayuda ubos sa SAP.
Ang DSWD miangkon nga adunay mga pamilya nga kwalipikado sa SAP nga wala maapil sa ilang listahan ug sila nagpatabang sa mga lokal nga kagamhanan (LGU) kabahin niini.
Si Gemma dela Cruz, ang nangulo sa Crisis Intervention Unit sa DSWD, misaysay nga ang listahan sa mga wala maapil nga pamilya gikan sa LGU kinahanglan pa kining i-review ug siya nanghinaut nga aduna pa’y pondo ang gobyerno alang kanila.
“For now, we still have to wait for the advice from the Central Office. We are hopeful that there will be funding for these left-out families,” sulti ni dela Cruz.
Adunay 5,722 ka pamilya sa Davao Oriental ang wala maapil sa SAP, ug silang tanan napamatud-an na sa DSWD nga kwalipikadong modawat sa P6,000 nga ayuda. (LBG)
