DAKBAYAN SA DABAW (Marso 23) — Gisaway sa kadagkuan sa Department of Education ug Simbahang Katoliko sa Albay ang plano sa ilang Provincial Health Office nga manghatag ug libreng condom sa mga estudyante sa high school.
Ang katuyuan sa pagpanghatag ug condom, subay kuno sa kampanya sa pagsumpo ang pagtaas sa ihap sa mga batan-on nga nakakuha ug human immunodeficiency virus-acquired immunodeficiency syndrome (HIV-AIDS) ug sayong pagkabuntis sa kababayen-an.
Unang misaway sa plano mao ang kadagkuan sa Department of Education (DepEd) og sa mga organisasyon sa simbahang Romano Katoliko.
Sumala ni Gilbert Sadsad, regional director sa DepEd, dili nila tugutan ang pagpanghatag ug condom sa mga estudyante sa high school og uban pang kotraseptibo.
Midugag si Sadsad, kung ipadayon gyud sa probinsya ang ilang plano, iyang istoryahon si DepEd Secretary Leonor Briones aron mapakanaug ug opsiyal nga baruganan sa maong isyu.
Si Fr. Al Ray Compuesto, ang lider sa Commission on the Youth sa Diocese sa Legazpi, misaysay nga ilang gikasubo ang plano sa probinsya, ug ila kining babagan.
“Karon tuiga, nagsaulog kita sa tuig sa mga kabatan-onan unya mao ni ang plano sa probinsya, imbis nga atong tudluan ang mga batan-on sa ilang papel sa komunidad, ila na man hinuon tagaan ug condom,” saysay sa pari.
Samtang si Antonio Ludovice, ang acting provincial health officer sa Albay, nagbutyag, ilang hatagan ug condom ang mga estudyante sa high school isip pamaagi sa paglikay sa pagkaylap sa kaso sa HIV-AIDS ug tungod kay base sa ilang rekord, taas na ang ihap sa kaso sa HIV-AIDs ug sayong pagkaburos sa mga batan-on sa Albay.
Midugang si Ludovice nga sila makig dialogo sa simbahan ug sa DepEd subay sa ilang plano.
Sa talaan sa DOH sa mga probinsya nga daghan ug kasong HIV-AIDS, mitala ug 33 porsyento nga pagtaas ang probinsya sa Albay miadtong milabayng tuig 2017 nga dunay 71, kumpara sa tuig 2018 nga miabot na sa 106,
Tungod niini, matud ni Loduvice, nanguna ang probinsya sa Albay nga dunay taas nga kaso sa HIV-AIDS sa tibouk rehiyon sa Bicol-jap/NewsLine.ph.
