DAKBAYAN SA DAVAO— Gikondena sa Philippine National Police ang pagpusil-patay kang police Captain Roland Arnold Moralde niadtong Huebes sa buntag didto Barangay Poblacion 2 sa Parang, Maguindanao del Norte.
Sa usa ka sulat pahayag, gipadangat ni PNP Chief Police General Rommel Francisco S Marbil ang iyang kinasingkasing nga pahasubo sa mga pamilya, higala, ug kaubanan ni Police Captain Moralde.
Si Captain Moralde, usa ka dedikadong Commander sa Regional Mobile Force Company (RMFB) 14, Bangsamoro Autonomous Region in Muslim Mindanao (BARMM).
Migawas sa inisyal nga imbestigasyon sa Parang Municipal Police Station nga nakasugat ni Moralde ang usa ka indibidwal nga giilang si Mohiden Ramalan Untal kinsa nabantayan nga nagbitbit armas sa Parang Public Market.
Dunay nahitabo ang komprontasyon ug sa dihang misulay og rekisa si Moralde kang Untal misangpot sa pagpinusilay nga miresulta sa kamatayon sa opisyal samtang napusilan usab ni Morales si Untal.
Dugang sa PNP, namatikdan nga atol sa pagbinayloay ug bala ni Moralde ug Untal, dunay nangabot nga mga kauban ni Untal nga miapil sa pagpusil kang Moralde.
Nakita sa Scene of the Crime Operative sa BAR ang mga basyo sa bala gukan sa calibre .45 ug 9mm nga mga armas.
Sa sulat pahayag sa PNP karong buntag, Mayo 3, gibutyag niini nga si Moralde ug Untal nadeklarang patay na sa dihang miabot sa hospital.
Apan, sa unang pahayag sa PNP-BAR, nakig-alayon kuno sila sa barangay ug ila pang gipangita si Untal.
Gimandu ni PNP Chief Marbil ang paghimo og hingpit nga imbestigasyon aron mahibaw-an ang motibo sa likod sa makalilisang nga insidente ug dali nga madala ngadto sa hustisya ang mga sad-an.
Giawhag ni Heneral Marbil ang mga indibidwal nga adunay kalabutan nga kasayuran nga moduol ug mokooperar sa mga awtoridad.
police-captain-nga-misita-sa-nagdalag-armas-gipusil-patay
Sumala sa PNP Chief nagpabiling lig-on ang PNP sa ilang misyon sa pagpatunhay sa kalinaw ug kahapsay alang sa kaluwasan ug seguridad sa tanang lungsuranon sa tibuok nasod
.“Maghiusa kita sa pagkondenar sa tanang matang sa kapintasan ug sa pagsuporta sa atong mga opisyal sa pagpatuman sa balaod nga nagrisgo sa ilang kinabuhi matag adlaw aron mapanalipdan ug maserbisyohan ang atong mga komunidad,’ Dugang ni Marbil.
