DAKBAYAN SA DAVAO, Pilipinas— Wala nay biahe ang Philippine Airlines (PAL) gikan sa Baguio paingon sa Cebu ug vice versa sukad karong Hulyo 1, 2024.
Nagpahibalo ang PAL sa ilang mga pasahero ug gisaysay niini nga gamay ra ang mosakay sa nahisgutang rota hinungdan nga nadesisyonan nga ila na kining ihunong.
Buot ipasabot nga ang mga taga Sugbo nga gustong makasinati og Baguio o adunay negosyo nga kalihokan sa dakbayan kinahanglang mobiyahe sa dagat ug yuta. Sa samang paagi, ang mga taga Baguio ug mga kasikbit nga lugar sa Luzon moagi usab sa samang proseso.
Ang kasagaran nga oras sa pagbiyahe pinaagi sa ayroplano gikan sa Cebu padulong sa Baguio ug vice versa usa ka oras ug 45 minuto.
Ang flag carrier nagbukas sa ilang commercial flights Baguio-Cebu ug vice versa niadtong Disyembre 2022.
Hinuon, gipasalig sa PAL nga ang mga pasahero sa mga nakanselar nga flights sa Baguio-Cebu-Baguio mahatagan sa gikinahanglang tabang ug refund.
