ANG Philippine Basketball Association (PBA) andam nang mohatag og hinabang kang former PBA star Nelson Asaytono human kining gi-atake sa kasing-kasing sa miaging semana.
Si PBA commissioner Willie Marcial usab nagkanayon nga ang mga kanhi sikat nga player sa liga mohatag pud og pinansiyal nga hinabang kang Asaytono.
Matud pa ni Marcial nga ila nang gi-asikaso ug gipangitaan na og paagi ang pagpadala sa ilang mga hinabang ngadto kang Asaytono samtang ang tibuok Luzon gipaubos pa sa enhanced community
quarantine (ECQ).
“Ina-arrange na natin paano maipapa-abot yung tulong ng PBA kasi nga naka ECQ pa tayo,” pulong pa ni Marcial.
Ang 53-anyos nga si Asaytono gi-atake samtang nagdula og basketball kauban silang General Trias, Cavite Vice Mayor Maurito Sison ug NLEX assistant vice president Ronald Dulatre didto sa lungsod sa Gen. Trias.
Gidala siya sa intensive care unit sa usa ka tambalanan sa Gen. Trias, apan nakagawas na sa hospital niadtong Sabado, Abril 11.
Ang six-foot-four nga power forward mao ang second overall pick niadtong 1989 PBA draft, kung diin iyang nakadungan silang
Benjie Paras, Renato Agustin, Zaldy Realubit, Elmer Cabahug, Paul Alvarez, Romy dela Rosa, Dindo Pumaren, ug Ricardo Marata.
Nakadula siya og 17 ka season, nakadaug og pito ka kampyonato, ug naka-apil sa 10 ka All-Star Game sa PBA.
Lakip sa mga team nga iyang gidulaan mao ang Purefoods, Pop Cola, San Miguel Beer, ug Red Bull.
Si Asaytono naka-score og 12,268 points, ang ika-limang taas nga all-time scoring sa PBA.
Usa siya sa mga nisalmot sa “PBA Return of the Rivals” niadtong Pebrero 2019, kung diin siya nidula sa San Miguel Legends kaatbang ang Alaska Milk Legends.(LBG)
