SI WORLD women’s boxing champion Nesthy Petecio nagpaabot sa paglibkas sa Enhanced Community Quarantine (ECQ) sa Baguio City aron siya makabalik sa iyang training nga
nahunong tungod sa coronavirus disease (Covid-19) pandemic.
Matud pa ni Petecio, ang pagpaubos sa Baguio ngadto sa General Community Quarantine (GCQ) karong Mayo 16 usa na ka dakong lakang paingon sa pagbalik sa normal sa iyang training, bisan kung aduna pa gihapo’y mga restriksyon nga ipatuman.
“Ganahan kong mobalik dayon sa akong training inig sugod sa GCQ. Kinahanglan nakong makuha og balik ang akong pisikal nga kondisyon para sa Olympics,” ingon ni Petecio, ang 2019 Southeast Asian Games gold medalist.
Si Petecio napakyas nga mo-qualify sa Olympics human siya napildi sa
quarterfinals sa Asia/Oceania Olympic Boxing Qualifying competition niadtong
Marso didto sa Jordan.
Pero tungod kay nagpositibo sa Covid-19 ang mga ni-qualify nga mga taga laing nasud, si Petecio natagaan og laing higayon nga makadula sa Olympics sunod
tuig.
Ang 28-anyos nga boksingerang Dabawenya nakatakda untang modula sa Global Boxing
Qualifiers karong bulana sa Paris apan kini gi-postpone dungan sa uban pang mga regional qualifying tournament.
Dakong panghinaut ni Petecio nga makabalik na siya bisan lang unta sa iyang kaugalingong pagbansay-bansay inig sugod sa GCQ.
“Kundili mi mamalengke, naa ra mi sulod sa among boarding house kay dili pwede ang mogawas bisan para magpasingot lang og gamay. Hopefully, ubos sa GCQ makabalik ko sa akong personal ug normal training para ma-maintain akong kondisyon,” sulti ni Petecio.
Limitado ra sa personal training ang mahimo ni Petecio sa Teachers’ Camp sa Baguio sugod Mayo 16 tungod kay gidili pa ang bisan unsang mga pagtapok-tapok ug
pagbukas og balik sa mga sports facility ubos sa GCQ.
Kung siya lang ang pabot-on ug kung pwede nang makabiyahe, gusto unta ni Petecio nga
makauli og kadali sa Davao para makauban iyang pamilya sa makadiyot niining panahon sa krisis. (LBG)
