ANG WORLD women’s featherweight champion nga si Nesthy Petecio malaumon nga makabalik na ang national boxing team sa ilang regular training human nga nalibkas na ang enhanced community quarantine sa nasud.
Si Petecio, kinsa nangita og tiket para sa Tokyo Olympics sunod tuig, miingon nga nagsugod na sila’g pasingot apan wala pa gihapon makabalik sa ilang regular nga pagbansay-bansay tungod sa gipatumang mga lagda sa general community quarantine (GCQ).
Dili sama sa cycling, equestrian, golf, running, ug skateboarding, ang boxing wala pa itugot sa gobyerno nga madula pagbalik ubos sa GCQ.
Tungod niini, si Petecio ug ang ubang mga national boxer nga nag-training sa Teachers Camp sa Baguio City kutob lang usa sa pagpasingot.
“Naghinay-hinay nami og balik sa training. Gitugtan nami nga mag-train sa oval, mag-circuit training, ug mo-lift og weights,” ang 28-anyos nga taga-Davao misugilon.
Dako ang paglaum ni Petecio nga malibkas na ang pagdili sa boxing sa pinakadali nga panahon aron masugdan na niya ang iyang pagpangandam sa umaabot nga Olympics qualifying tournament.
“Dako akong paglaum nga mabalik na ang tanan sa normal kay lisod gyud kaayo kung naa ka aning kahimtanga,” sulti ni Petecio.
Napakyas si Petecio sa iyang tinguha nga makasulod sa Olympics human siya napildi sa miaging continental qualifying competition didto sa Jordan niadtong Marso.
Hinuon, nahatagan siya og bag-ong paglaum human nga pipila sa mga qualifier sa ubang nasud nagpositibo sa novel coronavirus ug dili na makadula sa Olympics.
Gikatakda untang ipahigayon ang sunod nga Olympic qualifying tournament miaging bulan sa Paris, apan gi-postpone kini tungod sa pandemya.
Hangtud karon wala pa makadesisyon ang Olympic Boxing Task Force kung kanus-a ipahigayon ang qualifying tournament, apan si Petecio nag-ingon nga kanunay siyang andam sa bisan unsang mahitabo.
“Nagsige nako’g tan-aw sa mga video sa akong mga away kung asa ko napildi, ilabi na kadtong sa Olympic qualifier sa Jordan,” saysay ni Petecio.
“Gusto kong makabalik gikan sa akong mga pildi ug makakuha og slot sa Olympics. Mao na ang naghatag nako’g kadasig,” dugang niya. (LBG)
