DAKBAYAN SA DAVAO —— Usa ka balaudnon ang gipasaka sa Kongreso nga mosilot ug mopriso gikan duha (2) hangtud upat (4) ka tuig ug multa nga gikan P100,000 hangtud P300,000 ang ginikanan nga dili mohatag suporta sa iyang anak.
Kini ang unod sa House Bill 44 kon the Child Support Enforcement Act, usa ka balaudnon nga gipasaka na sa Kongreso ni Northern Samar Representative Paul Daza.
Ubos sa nahisgutang balaud, kung mohatag na og kamanduan ang otoridad, gikinahanglan nga mohatag og P6,000 kada bulan kon P200 nga suporta ang ginikanan sa iyang anak.
Sa iyang sulat pahayag, gisaysay ni Daza nga ang “Balasubas nga ginikanan- naa pay panahon magtarong ug atubangon sa ilang responsibilidad.”
Matud ni Daza, “Panahon na nga maghimo og balaud aron maprotektahan ang mga bata gikan sa nga iresponsableng ginikanan.”
“Huna-hunaa kining mga bataan wala mamili nga ipakatawo, nganong sila man ang mag-antos kung magbulag ang ilang mga ginikanan?,” dugang ni Daza.
Apan, usa sa mga rekisito, kinahanglan nga mahibaw-an ang tinoud nga ginikanan sa mga bata aron makakuha sila og suporta.
Ubos sa gilatid sa balaud, ang mga ‘solo parents’ puedeng mangayo og tabang sa gobierno aron pangitaon ug pasakahan og kaso ang ilang iresponsableng ginikanan.
Gilatid sa balaud nga gipasaka ni Daza, nga ang ginikanan kinahanglan nga responsible sa pagpadaku sa ilang mga anak, kung magbulag sila kinahanglan nga magpadayon og suporta ang ginikanan aron mahatagan og igong seguridad ug suporta ang mga bata.
Usa sa mga responsibilidad sa estado mao ang paghatag og oportunidad sa mga bata nga dunay mapuy-an, dunay pagkaon, ug mabuhi nga haruhay.
Ubos sa nahisgutang balaud, gikinahanglan nga mahatagan ang mga bata og libreng konsultasyon ug libre sa pampublikong hospital.
Ang Department of Social Welfare and Development (DSWD) motabang aron masubay kinsa ang ginikanan sa bata subay sa Implementing Rules and Regulations of the Act sa Child Welfare law.
Motabang usab ang Department of Health; Department of Justice; ug ang Philippine Statistics Authority sa pagsubay sa mga papeles sa bata.
Aron mas mapadali ang proseso sa pag-ila, mas maayong boluntaryong ilhon sa mga ginikanan ang bata, ug pasabton sa ilang responsibilidad isip mga ginikanan.
Sa pagkahimugso palang sa bata kinahanglan na nga mailhan ang ginikanan niini.
Kung dunay modisguto, ipailawon sa deoxyribonucleic acid kon DNA test aron mailhan ang ginikanan.
