ANG SOCIAL distancing kinahanglan nga ipadayon ug angayang dawaton nga “new
normal” hangtod nga aduna na’y bakuna para sa coronavirus disease (Covid-19).
Kini ang gisulti ni Pangulong Rodrigo Duterte sa iyang public address nga gisibya sa PTV-4 karong Martes, Mayo 12, kung diin iyang gipahinumduman ang katawhan kung unsa kamahinungdanon ang pagpahinay sa pagkatap sa Covid-19 sa nasud.
“Social distancing. Ito ‘yung new life until such time na meron nang vaccine. Sundin lang ninyo ‘yan. Importante masyado ‘yan,” ingon ni Pangulong Duterte.
Gipahinumduman usab sa Pangulo ang publiko nga kanunay’ng magsul-ob og face mask gawas sa balay kung dili sila gustong masita sa kapolisan.
“Do not go out of your house without a mask. That is a must. Must comply. Tatapikin ka ng pulis. Hindi ka naman hulihin pero nakakahiya sabihin sa’yo, ‘Pre, tumabi ka muna,'” sulti ni Duterte.
Iya usab gipasidan-an ang katawhan nga dili mahimo nga aduna pa’y “second wave” o “third wave” sa Covid-1 nga mahitabo sa Pilipinas.
“Remember na the easing up of the restrictions, hindi iyan (ibig) sabihin na wala na ang Covid. Just because we allowed certain people…dahan-dahan lang, dahan-dahan lang sa ngayon para walang ano…hindi tayo madapa. We cannot afford a second or third wave na mangyari,” ingon niya.
Iyang gipasabot nga ang mga lagda nga gipatuman sa gobyerno alang kini sa
kaluwasan og proteksyon sa katawhang Pilipinhon ug ang pagsupak niini magbutang kanila sa peligro, “The injunctions given by government ‘yung anong…ang mga salita na ‘huwag’, ‘ganito’, ‘ito gawain mo’, ‘ito huwag mong gawin’, it is intended for your protection,” si Pangulong Duterte mipatin-aw.
Pipila ka oras human sa public address sa Pangulo, gipahibalo sa Malañang Palace nga
ang Laguna, mga dagkong dakbayan sa National Capital Region, lungsod sa
Pateros, ug ang Cebu City gipaubos na sa Modified Enhanced Community Quarantine (MECQ).
Matud pa ni Presidential Spokesperson Harry Roque, kining mga lugara gipaubos sa MECQ tungod kay padayong taas ang ilang mga kaso sa Covid-19.
Ang MECQ magsugod karong Mayo 16 ug matapos karong Mayo 31.
Ang mga lugar kung diin mikunhod na ang kaso sa virus gipaubos na usab sa General Community Quarantine (GCQ). (LBG)
