ANG PHILIPPINE Sports Commission (PSC) nagpaabot sa ilang pasalamat ngadto sa mga lider sa mga National Sports Association (NSA) nga nagpadala sa ilang kontribusyon alang sa kampanya batok coronavirus.
Si PSC senior executive assistant Marc Velasco nag-ingon nga sila nakurat sa
nagbahang suporta ug donasyon gikan sa mga NSA lider para sa mga frontliner nga
nadestino sulod sa Rizal Memorial Sports Complex (RMSC).
Ang RMSC maoy usa sa mga sports venue nga gihimong pasilidad alang sa pagtambal sa mga pasyente nga adunay Coronavirus disease (Covid-19).
“We are very thankful to those NSA officials who are showing their support by
giving out donations to our frontliners,” sigun ni Velasco.
Gatusan ka mga personal protective equipment (PPE), sama sa face masks ug
face shields, ug mga ginalon nga alcohol ang gipadala sa mga sports official para
pagtabang sa mga doktor, nars, ug ubang medical worker sa ilang tinguha sa
pagsumpo sa makamatay nga virus.
Matud pa ni Velasco, ang mga donasyon dakong tabang alang sa kaluwasan sa mga
frontliner.
Ang mga donasyon nga nadawat sa PSC gikan sa mga NSA official sa swimming, table
tennis, skateboarding, equestrian, ug sepak takraw.
Sumala pa ni Velasco, wala sila nangayo’g tabang gikan sa mga NSA, kundili ang mga
sports official mismo ang nagpakita sa ilang suporta sa kawsa sa PSC ug sa
Department of Health. (LBG)
