DAKBAYAN SA DAVAO — MAAYO ang tuig nga mosugat alang ngadto sa mga magtutudlo sa pampublikong tunghaan sa nasud kay ila nang madawat ang P1,500 nga dugang allowance human nga nalakip ang pondo alang niini sa bag-uhay lamang napirnahan ni Presidente Rodrigo Duterte nga 2021 National Budget.
Kabahin niining tinuig nga dugang allowance sa mga magtutudlo ang usbaw nga P5,000 gikan sa P3,500 agig ayuda alang sa pagpatuman niining bag-ong modalities sa pagtudlo human naapektuhan sa pandemya sa Corona Virus Disease kon Covid 19 ang nasud.
Sumala ni Education Secretary Leonor Broines nga daku ang ilahang pasalamat ngadto sa mga magbabalaud ug kang Presidente Duterte tungod niining hinanali nila nga pagtagad sa panginahanglanun sa mga magtutudlo nga labihang naglisud usab tungod apektado ang ilahang pagtudlo pinaagi sa Distance Learning Method.
Samtang giklaro sab sa DepEd nga karong tuiga wala nay madawat nga P500 nga tinuig nga medical allowance ang mga magtutudlo sanglit gilakip na kini sa maong gidugang nga P1,500 nga dugang allowance. Ang maong P1,000 usab ilaha kining madawat atol sa pagsaulog sa World Teachers Day karong bulan sa Oktobre.Â
Apan ang unyon sa mga magtutudlo nga Alliance of Concern Teacher kon ACT wala gikalipay ang maong dugang P1,500 nga allowance alang sa mga magtutudlo nga gihatag sa Dep Ed tungod alang kanila dili pa gayod kini paigo sa daku nila nga panginahanglanun ilabina nga bag-o ang sistema sa pagtutdlo nga ilahang gipatuman karon tungod sa Pandemya.
Gibutyag sa ACT nga ang P1,500 nga teaching allowance kung diin P500 niini alang sa medical allowance dili gayod pasakto sa mga galastuhon nila alang sa communication ug internet expenses sa tibook tuig.
Sa sumada usab sa ACT ang usa ka libo nga tinuig nga allowance nga madawat sa mga magtutudlo kung bahin-bahinon kini sa usa ka tuig mamahimo lamang nga tig P83 matag bulan kung diin mas gamay gihapon sa pundo nga gihatag sa DepEd sa miaging tuig nga anaa sa P300 matag bulan.
Nasayran nga sa miaging tuig ang ahensya sa edukasyon nagtugot sa iyahang mga empleyado nga mag-reimburse ngadto sa tig P300 pesos matag bulana alang sa communication expenses gikan sa bulan sa Marso hangtud Disyembre tuig dos mil baynte.
Sa miaging tuig usab ang DepEd mihangyo og pundo balor P4 bilyones gikan sa Department of Budget and Management aron i-suporta sa distance learning initiative sa ahensya kung diin lakip sa mga probisyon dinhi ang paghatag og load allowance sa tanang public school teachers ug mga tinun-an sa senior high school.-Marvin Pineda
