DAKBAYAN SA DABAW (Septembre 15) — Si Police Officer 1 Querubin John Coyno Ferido, ang pulis trainee nga na buy-bust kagahapon sa buntag, tigamit na ug shabu una pa man sya nakatraining sa Philippine National Police.
Sumala ni Police Regional Director Marcelo Morales, nikumpisal ni Ferido nga nagagamit na sya ug ilegal ang druga, una pa kini nadawat sa PNP.
Si Ferido nadakpan kagahapon human niya gibaligyaan ug ‘Shabu’ ang usa ka membro sa Talomo Police.
Una niini, gibutang na si Ferido sa Regional Police Holding and Accounting Office (RPHAO), human kini nadakpan nga naka-inom ug ilimnong makahubog samtang naga training.
Tungod sa panghitabo, wala na nakadawat si Ferido sa iyang sueldo ug binulang alawans.
Nikumpisal si Ferido nga naka-undang sya ug gamit ug shabu kadyot, hinungdan nga nag-negatibo kini sa gihimong drug test.
Mopaso na unta si Ferido karong Oktobre kuyog sa Batch 2017 sa PNP, apan imbis nga diploma ang iyang gunitan, rehas sa prisohan na ang iyang nakaptan.-Harold V. Pontongan/NewsLine.ph
