DAKBAYAN SA OZAMIZ (Mayo 22) — Patay ang usa ka retired prosecutor kon fiscal, human kini pusila sa makadaghang higayon sa wala mailang mga suspetsado, kaganinang buntag,  Marte, Mayo 22, didto sa Gomez corner Kaaminio Streets, dinhi sa Ozamiz City.
Giila ang biktima nga si Geronimo Marave Jr., 62, retiradong fiscal ug mulopyo Catadman, Manabay, Ozamiz City.
Si Police chief inspector Jovie Espenido, hepe sa Ozamiz City Police, nagbutyag nga nakaangkon og daghang igo sa iyang ulo ug dughan si Marave, hinungdan sa iyang hinanaling kamatayon.
Sumala sa investigation sa PNP, si Marave gikan sa China Bank Ozamiz Branch nga nahimutang sa Gomez corner Kaaminio Streets, ug sa dihang misakay na kini sa iyang sakyanan kalit lamang nga mibabag ang usa ka single nga motor, samtang duha ka suspek ang miposil kaniya sa makadaghang higayon gamit ang kalibre 45 nga pistola.
Nakuha gikan sa crime scene ang 14 ka basiyo sa kalibre 45 nga pistola.
Miikyas ang mga suspek sakay sa duha ka motor nga naghulat sa unahan.
Mipalayo ang mga suspek sa wala matino nga direksyon.
Naigo sad sa mga bala ang puti nga Furtuner ni Marave nga adunay plate number POY 485.
Gidala ang fiscal sa labing duol nga tambalanan apan hikabsan na kini sa kinabuhi.
Padayon pa ang imbestigasyon sa kapolisan sa nasangpit nga hitabo. Gisuhid pa sa PNP kon aduna bay nakuha ang CCTV sa maong pagpamosil.
Wala pa usay gipagawas nga pahayag ang pamilya sa biktima.-Neptalie Batolenio/Newsline.ph
