ANG SIKAT nga football player nga si Cristiano Ronaldo mitungha na sa training center sa iyang team nga Juventus didto sa Italy niadtong Martes, Mayo 19, human sa napulo ka semanang pagpahulay.
Si Ronaldo, nga mipakita sa Juventus training center alang sa medical tests, gikan nagpaubos sa duha ka semanang pag-kwarentina sa iyang balay sa Turin human niya gipalabay ang lockdown sa iyang yutang natawhan sa Portugal.
Wala niya makauban ang iyang mga teammate sukad nila gipildi ang Inter Milan, 2-0, niadtong Marso 8.
Pagkahuman sa maong dula, nilarga dayon si Ronaldo pauli ngadto sa Madeira, Portugal, usa ka adlaw sa wala pa gipatuman sa gobyerno sa Italy ang lockdown tibuok nasud.
Ang mga tigpasiugda sa Serie A nga liga nanghinaut nga mapadayon ang ilang torneyo sa Hunyo 13 kung tagaan og pagtugot sa gobyerno, nga nagdili sa mga sports events kutob Hunyo 14.
Sa pipila ka mga Juventus player nga mibiya sa Italy panahon sa lockdown, si Ronaldo ang pinakaunang mibalik sa team.
Sama sa tanang magdudula sa Serie A, si Ronaldo gipaubos sa coronavirus disease (Covid-19) testing ug uban pang mga physical exam.
Samtang wala gibutyag sa Juventus ang mga resulta sa mga Covid-19 test, ang team nag-post sa ilang website og mga litrato ni Ronaldo nga nag-inusarang nagbansay-bansay.
Tulo ka Juventus player — Daniele Rugani, Blaise Matuidi, ug Paulo Dybala — nagpositibo sa Covid-19, apan silang tulo naulian na. (LBG)
