ANG Philippine Sports Commission (PSC) mikanselar sa tanang mga sports event sa tibuok nasud karong tuiga.
Mao kini ang gipahibalo ni PSC chairman William “Butch” Ramirez sa mga sportswriter pinaagi sa text niadtong Miyerkules, Abril 29.
Matud pa ni Ramirez nga wala na’y mga sports activity nga pagahimuon sa tibuok nasud hangtud nga wala pa’y bakuna o tambal para sa coronavirus disease (Covid-19).
“For as long as there’s no available vaccine, no sports competition activities can be held. But for individual physical fitness, it’s alright,” ingon ni Ramirez.
Bisan og walay gahum ang PSC sa mga pribadong liga sama sa University Athletic Association of the Philippines (UAAP) ug Philippine Basketball Association (PBA), si Ramirez nag-ingon nga ang mga sports organization kinahanglan gyung motuman sa
mga lagda sa kagamhanan.
“The UAAP has its own charter and board, but they have to follow the latest government guidelines. The same with the PBA,” sulti sa PSC chairman.
Ang PSC midesisyon usab nga hunongon nila ang paghatag og pinansiyal nga suporta sa kaduha nang na-postpone nga 10th ASEAN Paralympic Games (APG).
Ang ASEAN Paralympic Games gikatakda untang pagahimuon sa Pilipinas pagkahuman sa Southeast Asian Games niadtong Disyembre. (LBG)