DAKBAYAN SA DAVAO-— Mangapud-apod og pagkaon sa mga residenteng Muslim ang mga sundalong sakop sa 106th Infantry Battalion (106IB) sa Philippine Army nga nakabase sa lungsod sa Imelda, Zamboanga Sibugay, atol sa Iftar.
Ang ginadulot nga panihapon ginahimo pagkahuman sa pagsalop sa adlaw samtang ginasaulog ang Ramadan,
Mokabat sa 30 ka mga mosque sa probinsya sa Zambonga Sibugay ang ilang tunolan og pagkaon.
Sumala ni Lt.Col. Anshary Pumbaya, commander sa 106th Infantry Battalion, ang kick-off ceremony sa Iftar nga mga halad nagsugod niadtong Marso 12 sa usa ka mosque sa Poblacion village, lungsod sa Malangas, nga nagsilbi sa dul-an sa usa ka gatos nga Muslim faithful.
Matud ni Pumbaya 29 ka mga mosque sulod sa probinsiya ang ilang hatagan atol Iftar sa tibuok buwan sa Ramadan.
Gisaysay sa opisyal nga kini ang mga paningkamot sa yunit aron mahuptan ang maayong relasyon, malungtaron nga kalinaw ug kalamboan sa dapit kung diin sila nahimutang.
“Ang pagdulot og simpleng pagkaon atol sa Iftar ngadto sa Muslim Communities dili lamang magpakita sa ka importansya sa paghatag kon dili usa usab ka panahon sa inspirasyon ug kahigayonan nga magkauban, magpalig-on sa mga relasyon, ug magpakita og pasalamat sa tanang panalangin sa kinabuhi, ilabi na ang panalangin sa kalinaw ug panaghiusa sa tanan,” dugang ni Pambuya.
