DAKBAYAN SA DAVAO —Gikinahanglan nga ipadayon sa sunod nga Philippine National Police (PNP) Chief ang imbistigasyon sa mga pulis nga milapas as operasyon kontra illegal nga druga.
Kini ang giluatan ni Department of Justice (DOJ) Secretary Menardo Guevarra niadtong Martes Oktobre 26, 2021.
Mipagawas si Guevara sa iyang baruganan kay hapit na moretiro si PNP chief, Gen. Guillermo Eleazar.
Matud ni Guevara, adunay mandu si Presidente Rodrigo Duterte sa DOJ ug sa PNP nga balik-lantawon ang mga pamaagi kung gi-unsa pagpatuman sa kapulisan ang iyang mandu kabahin sa giera kontra illegal nga druga ug pasakahan og kaso ang nakalapas sa balaud.
Si Eleazar mokanaug na sa iyang puesto karong Nobiembre 13, tungod kay kinahanglan na niyang moretiro sa edad nga 56.
Molingkod si Eleazar isip PNP sa sulod sa umon ka bulan.
Naglaum si Guevarra nga ang Memorandum of Agreement tali sa National Bureau of Investigation ug sa PNP sa usa ka hiniusang pag-imbistiga kabahin sa mga namatay sa drug war mapirmahan una pa man mokanaug si Eleazar sa iyang puesto.
Niadtong milabayng semana, nagpagawas ang NBI og inisyal nga 52 ka kaso sa mga nangamatay sa drug war, aron ilang istudyuhan kung duna bay kalapasan nga nahimo ang mga pulis, ug iyang gipaniguro sa pamilya nga walay silay dapigan kung pananglitan duna silay makit-an nga sipyat sa gihimo sa kapulisan.
Ang paglantaw sa mga kaso nakabase sa lugar, pangalan sa biktima ug petsa sa insidente.
