DAKBAYAN SA DABAW-— Negosyante nga giingong tag-iya sa RTM Investment Scheme sa Panabo City, gipusil patay kagahapon sa hapon didto sa Purok 3, Peñano St., Calinan District ning syudad.
Sumala sa Davao City Police Office, ang negosyante nailhan nga si Elizabeth Lanticse Mantalaba, 29, minyo, molupyo sa Purok 2, New Visayas, Panabo City.
Sa inisyal nga imbistigasyon sa kapulisan, una pa man nahitabo ang pagpusil sa biktima, nakapa-blotter na kini sa Panabo Police, nga nakadawat siya ug pagpanghulga.
Sumala pa, alas tres (3:00) sa hapon niadtong Lunes, Septiembre 30, mosakay na unta si Mantalaba sa iyang Toyota Hilux sa dihang kalit kining gipusal sa iyang ulo, sa wala mailhing lalaki, nga maoy hinungdan sa iyang hinanaling kamatayon.
Nakakuha ang kapulisan ug duha (2) ka basiyo sa bala gikan sa .45 nga pusil sa lugar kung asa nahitabo ang krimen.
Gibutyag usab sa kapulisan, real estate broker og naninda ug school supplies ang biktima ug siya usab ang manager og nanag-iya sa RTM Investment Scheme didto sa Panabo.
Daling misibat ang suspetsado sakay sa usa ka motorsiklo nga naghuwat kaniya.
Padayon pang giimbistighan sa kapulisan ang motibo sa pagpatay sa biktima.-CACS/NewsLIne.ph
2
