Kumander sa NPA misurender, hinay na kuno ilang puersa

Posted on

DAKBAYAN SA DABAW — Usa ka kumander sa New People’s Army (NPA) ang misurender sa Davao de Oro Provincial Task Force-Ending Local Communist Armed Conflict (PTF-ELCAC), niadtong Lunes sa Barangay Cabinuangan, New Bataan, Davao de Oro.

Sumala ni Lt. Col. Ezra Balagtey, tigpamaba sa Eastern Mindanao Command (Eastmincom), misurender si “Bart”, ang kanhi bise-kumander sa NPA nga naglihuk sa northern boundary sa Davao de Oro ug Davao Oriental niadtong Lunes Pebrero 10, 2020.

Gisaysay ni Bart kang Balagtey nga midesisyon siya nga muhawa sa kalihukan human, sunod-sunod nga misurender ang iyang mga kauban sa sabakan sa gobierno, samtang ang uban nagtago-tago tungod sa kalisod sa kinabuhi nila sa bukid.

“Nasulayan na niya nga magsige ug tago-tago, kay mihinay na ang kalihukan tungod kay walay nay masa mga misuporta kanila,” pahayag ni Balagtey.

“Gibutyag usab ni Bart nga nag-ipon na ang puersa sa mga rebelde, kay gamay nalang sila,” saysay niini.

Misurender si Bart, usa ka bulan human misurender ang iyang asawa nga si Joy didto sa Barangay Panansalan, lungsod sa Compostela.

Si Bart nagbutyag nga 26 na ka membro sa iyang unit ang misurender sa gobierno.

Ginaproseso na sa gobierno ang papeles ni Bart ug iyang asawa aron i-apil sila sa listahan Enhanced Comprehensive Local Integration Program (E-CLIP).-Jiann A. Padillo

Be informed
  • 2
  •  
  •  
  •  
  •  
    2
    Shares
  • 2
  •  
  •  
  •